Firokeyên Tirkiyê devera Biradost bombebaran kirin

Artêşa Tirkiyê piştî bicihkirina leşkerên xwe li çiyayên Kitkîn, Xwakurk û bilindahiyên wê deverê, niha firokeyan bi kûrahiya nêzîkî 20 kîlomtre axa Başûrê Kurdistanê li sînorê Sîdekanê bombebaran dikin.

Rêveberê Bajarokê Sîdekan Îhsan Çelebî ji Rûdawê re ragihand: “Îro şemiyê (07-04-2018) di saet 13:45 xulekan de Artêşa Tirkiyê bi tundî dest bi bombebarankirina bilindahiyên Robya, Pungistan, Pîr Îbrahîmî, Kewerte û Robî kir û ev dever li nêzîkî cihên avakirî ne, ji ber bombebaranan dîsa hejmarek gundên din têne valakirin û welatî rastî awarebûnê tên.”

Îhsan Çelebî herwiha got: “Di nav 72 saetên derbasbûyî de firokeyan 9 car sînorê Biradost bombebaran kirin û bi awayekî berdewam firokeya bêpîlot jî li esmanan digere, piştî bawerbûna ji her bilindahiyeke deverê li dû bombebarana tund, bi rêya helîkopterê cendirme têne danîn.”