Peyamnêrê Rûdawê ragihand, ku helîkopterên şer ên Iraqê gundên Zenane û Dawûde yên navçeya Xurmato bombebaran dikin.
Gundên Zinane û Dawûde heta niha jî di destê pêşmergeyên xwebexş de ye û ev hêz ji sedan malbatên koçberên Kurd ên Xurmatoyê pêk tê.
Hêjayê gotinê ye, ku îro Sêşemê 12-12-2017, çend guleyên hawanê li navenda Xurmatoyê ketin û li gorî zanyariyan çend çekdarên Heşda Tirkmenî hatine kuştin û çendek jî birîndar bûn.
Cîgirê Berpirsê Malbenda YNKê li Xurmatoyê Hesen Baram ji Rûdawê re ragihand: “Heta niha jî nayê zanîn ka ew hawan ji ku derê ve avêtine Xurmato lê kuştî û birîndarên çekdarên Tirkmen hene. Piştî vê êrîşê Heşda Tirkmenî dest bi topbarana Çiyayê Hencîre kir.”
Ji 16ê Cotmehê ve ji ber êrîşa Heşda Şeibî bi dehan hezar nîştecihên Kurd ên Xurmatoyê koçber bûne. Li gorî raporên Rûdawê, çekdarên Heşda Şeibî gelek malên hemwelatiyên kurd talan kirine û şewitandine. Herwiha bareghahên partiyên Kurdistanî jî teqandine.
Piştî vekişandina pêşmerge, beşek ji pêşmergeyên xwebexş ên Xurmatoyê, ku hejmara wan digihe 500 kesan, li herêma Zinane û Dawûde hêzeke bi navê “Hêza Rizgarî” ava kirine.
Ji bilî pêşmergeyên xwebexş, li derdora Xurmatoyê hêzeke din a çekdarî peyda bûye, ku kes nizane ka ser bi kîjan rêxistinê ne. Tê gotin, ku hejmara wan jî zêdetirî 500 kesan e û di nava wan de Kurd, Ereb û biyanî jî hene.
Navçeya Xurmatoyê ser bi parêzgeha Selahadîn a Iraqê ye û 100kîlometre ji navenda parêzgehê dûr e. Beriya hatina Heşda Şeibî, hejmara şêniyên wî nêzîkî 220 hezar kes bûn, ku ji sedî 55 Kurd, ji sedî 15 Ereb û ji sedî 30 jî Tirkmen bûn.
