Nêçîrvan Barzanî: Hewla mamosteyên olî di pêşxistina pêkvejiyanê de girîng e

Serokê Herêma Kurdistanê Nêçîrvan Barzanî bi helkefta 52 saliya damezrandina Yekîtiya Zanayên Ola Îslamê ya Kurdistanê peyamek belav kir.

Nêçîrvan Barzanî pîrozbahiyên xwe pêşkeşî Serok û Mekteba Bicîkar a Yekîtiya Zanayên Ola Îslamê ya Kurdistanê û hemû mamosta û zanayên olî kir û serkeftin ji wan re xwest.

Di peyama xwe de Barzanî dibêje: “Bi vê minasebetê em bi rêz û hurmet li têkoşîna Yekîtiya Zanayan a di qonaxên şoreş û azadiyê de dinêrin û silavan li giyanê şehîdên Yekîtiya Zanayan dikîn. Em rol, pêgeh û bandora Yekîtiya Zanayan û Mamostayên Olî di civaka Kurdistanê de, bi taybetî di pêşxistina pêkvejiyanê, lêborîn û rûbirûbûna tundrewiyê de bilind dinirxînin.”

Serokê Herêma Kurdistanê di beşeke din a peyama xwe de destxweşî li Yekîtiya Zanayên Olî yên Kurdistanê kir, ji ber kar û hewlên wê yên ji bo bidestxistina mafên mamostayên olî û hemû piştevaniyê ji bo xizmetkirin û baştirkirina jiyana zana û mamostayên olî.