Serokwezîrê Herêma Kurdistanê Nêçîrvan Barzanî roja 08.08.2018ê li bajarê Hewlêrê, pêşwazî li Konsula Giştî ya nû ya Almanyayê ya li Herêma Kurdistanê Barbara Wolf û şandeya pê re kir.
Li gor daxuyaniya piştî civînê, Barbara Wolf spasiya saziyên Hikûmeta Herêma Kurdistanê kiriye ji bo hevkarî û hêsankariyên li kar û çalakiyên wan û tekezî li ser pêşvebirina têkeliyên navbera Almanya û Kurdistanê kiriye.
Konsula nû ya Almanyayê tekezî li ser wê yekê kir ku "hevkariyên di warê mirovî û leşkerî de ji aliyê welatê wê ve ji bo Herêma Kurdistanê berdewam dike û ji bo ku kompaniyên almanî li Herêma Kurdistanê di warên cuda de sermayeyên xwe razînin teşwîq dikin".
Nêçîrvan Barzanî pîrozbahî li destbikarbûna Barbara weke konsula nû ya Almanyayê li Herêma Kurdistanê kir û hêvî xwest ku di kar û çalakiyên xwe de serkeftî be. Serokwezîr spasiya Almanyayê kir ku di warê mirovî û leşkerî de alîkariya Herêma Kurdistanê dike, bi taybetî beşdariya Almanya di proseya çaksaziyên wezareta karûbarên Pêşmerge de û hêvî xwest ku ew alîkarî berdewam bin.
Serokwezîr Nêçîrvan Barzanî herwiha piştgiriya xwe û saziyên Hikûmeta Herêma Kurdistanê jib o kar û çalakiyên Konsulxaneya Almanyayê nîşan da û tekezî li ser wê yekê kir ku peywendiyên navbera Herêma Kurdistanê û Almanyayê di hemû waran de bêhtir bihêz bibin.
Rewşa herêmî bi giştî û piroseya siyasî li Iraqê û pêşhatên pêkanîna kabîneya nû ya hikûmeta Iraqê çend mijarên din ên civîna Serokwezîr Nêçîrvan Barzanî û Konsula nû ya Almanyayê bû.
