Li gor malpera fermî ya hikûmeta herêma Kurdistanê, duh 15.01.2018ê êvari wezîrê derve yê Amerîkayê Rex Tillerson peyvendiyek telefonî li gel serokê hikûmeta herêma Kurdistanê Nêçîrvan Barzanî pêkaniye û her du aliyan sala nû li yek pîroz kirin û wezîrê derve yê Amerîkayê hêvî û bendewariyên xwe yên ji bo seqamgirî û pêşketinên zêdetir ên salê aniye ziman û amaje bi peyvendiyên li gel herêma Kurdistanê kiriye.
Herwaha derbarê civînên di navbera hikûmeta Iraqê û herêma Kurdistanê yên ji bo çareseriya pirsgirêkan jî keyfxweşiya xwe aniye ziman û amadebûna xwe ya ji bo navbeynkariya Hewlêr û Bexdayê nîşan daye.
Tillerson piştgiriya Amerîkayê ya ji bo proseya demokrasî û helbijartinên Iraqê û herêma Kurdistanê ragehandiye û got; ez hêvîdarim herêma Kurdistanê ji krîza heyî rizga bibe û wê derbarê de jî piştgiriya welatê xwe ragehandiye.
Serokwezîrê hikûmeta herêma Kurdistanê Nêçîrvan Barzanî jî spasiya wezîrê derve yê Amerîkayê kir, ji ber piştgiriya wan a ji herêma Kurdistanê re û ragehand, naha jî metirsiya serî rakirina tundiyan heye û pêwîstiya mekanîzmayek sê alî ya herêma Kurdistanê, hikûmeta federal a Iraqê û Amerîkayê anî ziman.
Barzanî teqez kir, herêma Kurdistanê berdewam amadeye bo destpê kirina guftûgo û çareseriya pirsgirêkan li gel Bexda û guftûgoyên şandên Hewlêr û Bexda jî bi erênî pênase kir.
Herwaha Barzanî Washington wek hevpeymanê Hewlêr pênase kir û bo derbas kirina rewşa naha heyî jî got, pêwîstî bi piştgiriya dostane heye. Herwaha got proseya siyasî li herêma Kurdistanê û helbijartin proseyên cîdî ne.
