Serok Barzanî: Ez wê êrişa dijminane bi tundî şermezar dikim

Serok Barzanî her wiha got, "Ev çendîn car e ku ev cure êriş bêyî guhdana li bingehên cîrantiyê û yasaya navneteweyî li dijî Herêma Kurdistanê tên kirin.

Wezareta Pêşmergeyan ragihand ku îro serê sibehê Îranê bi şeş mûşekan êrişî hêzên wan kiriye û di vê êrişê de 6 Pêşmerge şehîd ketine û 30 Pêşmerge jî birîndar bûne.

Serok Mesûd Barzanî li ser êrişê daxuyaniyek belav kir.

"Êrişeke dijminane ye"

Serok Barzanî di daxuyaniya xwe de wiha got:

"Ez wê êrişa ku berê sibêha îro bi mûşekên Îranê li ser baregehên Hêza Pêşmergeya Kurdistanê hat kirin bi tundî şermezar dikim.

Mixabin di encamê de hejmarek Pêşmergeyên qehreman şehîd ketin û hejmareke din jî birîndar bûn.

Ez sersaxiyê ji malbatên şehîdên wê êrişa nerewa re dixwazim, xwe wekî hevparê xema wan dibînim û hêviya başbûneke bilez ji birîndaran re dixwazim.

Ew êrişeke dijminane ye û ti hincetê ranagire.

Ev çendîn car e ku ev cure êriş bêyî guhdan li bingehên cîrantiyê û yasaya navneteweyî li dijî Herêma Kurdistanê tên kirin.

Ev di demekê de ye ku Herêma Kurdistanê ne beşek ji şerê niha yê li herêmê ye û ti carî ji bo cîranan nebûye gef.

Pêşmerge sermayeya herî ezîz û binirx a gelê me ye."