Trump: Divê Îran xwe radest bike

Serokê Amerîkayê Donald Trump hûrgiliyên nû yên pêwendiya xwe ya telefonî ya bi Serokê Rûsyayê Vladimir Putin re eşkere kirin.

Trump ragihand ku Putin pêşniyar kiriye da ku wekî "aliyê sêyem" di peymana atomê û wergirtina wê uranyuma dewlemendkirî de alîkar be ku Washington dixwaze Tehran radest bike.

Trump tekez kir ku divê Îran xwe radest bike û ew rê nadin Îranê ku bibe xwediyê çekên atomê û got:

"Putin ji min re got ew dixwaze di mijara uranyumê de alîkariya me bike da ku em bigihîjin peymanekê.

Lê min ji wî re got ku ez zêdetir dixwazim tu di bidawîkirina şerê Ukraynayê de kar bikî ji ber ku ew ji bo min girîngtir e."

Serokê Amerîkayê ragihand ku hêzên çekdar ên Îranê heta radeyeke mezin ji kar ketine û got:

"Me hêzên deryayî, hêzên asmanî, parastina dijî balafiran, radar û hemû dezgehên wan têk birîne û gelekî kêm tişt mane.

Me nêzîkî ji sedî 80yî kargehên wan ên çêkirina mûşekan û şiyanên wan ji holê rakirine.

Eger em li hev nekin, ewên ku mane jî dikarin gelekî zû bên têkbirin."

Trump ducare kir ku Putin jî naxwaze Îran bibe xwediyê çekên aotmê û got:

"Ew (Îranî) bi xwe jî dizanin ku dê nebin xwediyê çekên atomê."

Şerê Ukraynayê

Trump derbarê şerê Ukraynayê jî geşbîniya xwe ya bi nêzîkbûna çareseriyê nîşan da û ragihand ku guftûgoyeke wî ya gelekî baş bi Putin re çêbûye.

Serokê Amerîkayê got,"Bi dîtina min Putin dixwaze çareseriyekê bibîne.

Min pêşniyara agirbesteke kurt li wî kir û ez bawer im dibe ku ew vî karî bike û tiştekî di wî warî de ragihîne, ji ber ku gelek kes tên kuştin û ew yek gelekî bêwate ye."

Trump helwesta medyayê ya derbarê şer jî rexne kir û got:

"Bi dîtina min Ukrayna di warê leşkerî de têk çûye lê hûn bi xwendina nûçeyên sexte wê yekê nizanin."

Trump amaje bi wê yekê jî kir ku dibe ku şerên li Îran û Ukraynayê bi nexşerêyeke heman rengî bi dawî bibin.

Serokê Amerîkayê di dawiya axaftina xwe de, behsa rikeberiya teknolojiyê kir û ragihand, welatê wî di warê hişê çêkirî (AI) de bi ferqeke mezin li pêşiya Çînê ye.