CENTCOM amarên "Operasyona Hêrsa Destanî" aşkere kirin

CENTCOMê di rapora xwe ya 1ê Nîsanê de hûrgiliyên wê operasyonê aşkere kirin, ku di 28ê Sibata borî de bi fermana rasterast a Serokê Amerîkayê dest pê kiribû. Hat ragihandin, hêzên asmanî û deryayî yên Washingtonê li zêdetirî 12 hezar û 300 armancên stratejîk li hundirê Îranê dane.

CENTCOMê destnîşan kir, heta niha zêdetirî 13 hezar êrîşên asmanî hatine encamdan. Di encama van êrîşan de, hêza deryayî ya Îranê ziyanên herî mezin dîtine, ku 155 keştî û keştiyên binavê bi temamî hatine rûxandin an jî ziyanên giran dîtine ku êdî nayên bikaranîn.

Rûxandina binesaziya Pasdaran û navendên dronan

Di raporê de hat gotin, operasyon bi armanca "hilweşandina sîstematîk a pêkhateya ewlehiyê ya rejîma Îranê" hatiye darêştin. Di nav armancên ku hatine lêdan de, ev cih hene:

- Navendên fermanmandehiyê û kontrolê.

- Baregehên sereke yên Supayê Pasdaran.

- Bingehên hewalgirî û malperên mûşekên balîstîk.

- Kargehên çêkirina dron û mûşekan.

- Sîstemên berevaniya asmanî û komgehekên çekan ên di binê erdê de.

“Çekên herî pêşketî hatine bikaranîn”

Amerîkayê di vê operasyonê de çek û firokeyên xwe yên herî nûjen û pêşketî bikar anîne. Di raporê de hat diyar kirin ku firokeyên stratejîk ên wekî B-1, B-2 Stealth, B-52 û firokeyên şer ên F-22 û F-35 beşdarî êrîşan bûne. Herwiha sîstemên berevaniya mûşekî yên mîna Patriot û THAAD li navçeyê hatine bicihkirin.

CENTCOMê tekez kir jî, operasyonên wan dê berdewam bikin da ku hemû metirsiyên li ser ewlehiya cîhanê û berjewendiyên Amerîka û hevpeymanên wê werin jinavbirin.