Fermandarekî Heşdî Şebiyê: Şer ber bi Îraqê ve tê

Fermandarekî payebilind ê Heşdî Şebiyê Dr. Ebdulrehman Cezairî, hişyariyeke tund da û ragihand, "Şer ber bi Îraqê ve tê."

Cezairî her wiha eşkere kir ku ji ber zextên Amerîkayê, projeyasaya taybet a Heşdî Şebiyê ji parlamentoyê hatiye vekişandin.

"Zexta Amerîkayê û projeyasaya Heşdî Şebiyê"

Dr. Ebdulrehman Cezairî di bernameya ajansa Rûdawê da got, pêwîst e li ser yasaya Heşdî Şebî bi hemû pêkhateyên Îraqê re gotûbêj bê kirin.

Wî anî zimên ku hin aliyên navxweyî û derve li dijî yasayê ne û divê bi têgihiştin ev mijar bê çareserkirin.

Cezairî got, "Heşdî Şebî mafê wê heye ku yasayeke wê ya taybet hebe," lê wî da zanîn ku heta niha serokwezîr neçûye Amerîkayê da ku Washingtonê qanih bike ku Heşdî Şebî ne girêdayî Îranê ye.

Li gor Cezaîrî, niha Hikûmeta Îraqê û Heşdî Şebî di rêyên cuda de ne.

Fermandarê Heşdî Şebiyê hişyarî da û got, "Em nikarin rûbirûyî Amerîkayê bibin.

Eger yasa bêyî lihevkirinê derbas bibe, Amerîka dê cezayên aborî li ser me bisepine. Aboriya Îraqê girêdayî petrolê ye û pereyê petrolê jî ji Amerîkayê tê."

Metirsiya şerê li ser Îraqê

Cezairî li ser bandora şerê Îran û Îsraîlê jî axivî û got, "Eger vê carê şer di navbera Îran û Îsraîlê de rû bide, dê bandora wî li ser Îraqê jî hebe. Şer ber bi Îraqê ve tê."

Wî îdia kir ku li gorî belgeyên di destê wan de, li derdora parêzgeha Idlibê ya Sûriyeyê hejmarek çekdarên biyanî kom bûne û amade ne ku derbasî Îraqê bibin.

Wî got, "Wate, DAIŞ careke din vedigere Îraqê."

Cezairî her wiha got, "Belgeyên me hene ku ji bo çekdarên biyanî nasnameyên sexte yên Îraqî hatine çêkirin.

Di rojên borî de çend çekdarên bi eslê xwe Sûriyeyî hatin girtin ku nasnameyên sexte yên Îraqî bi wan re bûn."

Projeyasaya Heşdî Şebiyê hat vekişandin

Ev daxuyanî piştî wê yekê tên ku 27ê Tebaxê şêwirmendê yasayî yê Serokê Parlamentoya Îraqê ji Rûdawê re ragihandibû ku Serokwezîrê Îraqê Sûdanî ji ber gefa cezayên giran ên Amerîkayê daxwaz kiriye ku projeyasaya Heşdî Şebiyê bê vekişandin.

Heşdî Şebî, piştî êrişa DAIŞê di sala 2014an de bi fetwaya Elî Sîstanî hat damezrandin.

Budceya wê di sala 2024an 4 trîlyon û 500 milyar dînar bû û hejmara endamên wê nêzîkî 238 hezar kesî ye.