Parlamentera DEM Partiyê: Karkerên Kurd li Nîgdeyê rastî êrişeke nijadperest hatin

Hat zanîn ku karkerên birîndar rakirine Nexweşxaneya Lêkolîn û Perwerdeyê ya Nîgdeyê.

Oduncu Kuteviyê dîmenên kêliya êrişê li ser hesabê xwe yê medyaya civakî parve kir.

"Ev êriş nîşan dide ku aştî çi qasî pêwîst e"

Parlamentera DEM Partiyê di parvekirina xwe de ev êriş wekî "faşîzan" bi nav kir û got:

"Li hember welatiyên me yên ku ji Sêwregê wekî karkerên demsalî çûne navçeya Borê ya Nîgdeyê, careke din êrişeke faşîzan pêk hat.

Di vê sîstemê de ku kedxwarî her heye, karkerên demsalî wekî beşa herî bêparastin hema bêje her sal rastî heqaretên wekî cudakarî, nijadperest û tundûtûjiyê tên.

Êrişa îro bi awayekî eşkere nîşan dide ku ewlehiya canê welatiyên me nehatiye dabînkirin."

Kutevî her wiha bal kişand ser pêvajoya çareseriyê û got, "Di serdemeke wiha de ku behsa aştiyê tê kirin, ev êriş careke din nîşanî me da ku aştî çi qasî jiyanî ye."

Parlamentera Kurd di dawiya daxuyaniya xwe de got, "Em şopdarê vê bûyerê ne.

Em slametiyê ji hemû malbatên xwe yên ku rastî êrişa nijadperest hatine re dixwazin û daxwaz dikin ku berpirsiyar demildest bên tespîtkirin û hesab bidin.

Em bangî Wezareta Karên Navxwe û hemû rayedarên pêwendîdar dikin ku erkê xwe bi cih bînin."

Li aliyê din, heta niha aliyên pêwendidar û Parêzgariya Nîgdeyê li ser bûyerê ti daxuyanî nedane.