Îran: Êrişa li ser mala Nêçîrvan Barzanî ne karê me bû

Konsulê Giştî yê Îranê li Hewlêrê Feramerz Esedi di hevpeyvînekê de bi Rûdawê re li ser têkiliyên Îran û Herêma Kurdistanê, vekişîna hêzên Amerîkayê ji Îraqê û êrişên li ser Herêma Kurdistanê axivî.

Esedi diyar kir ku Îran ji destpêka bûyerê ve êrişa li ser mala Nêçîrvan Barzanî şermezar kiriye û got: “Ji sedî 100 ne ji aliyê Îranê ve bû.”

Li gorî Esedi, piştî bûyerê Wezareta Karên Derve ya Îranê, Artêşa Pasdaran û saziyên din jî êrişê red kirine. Wî got ku Îranê li Herêma Kurdistanê, di nav partiyên Kurd de û di nav malbata Barzanî de ti armancek tune ye.

“Îran li Herêmê armancek tune ye”

Esedi got ku armancên Îranê li Herêma Kurdistanê bi du mijaran ve girêdayî ne: hêzên Amerîkayê û komên çekdar ên dijberî Îranê.

Wî ragihand ku berpirsên Herêma Kurdistanê beriya şer û di dema şer de jî bi Îranê re di pêwendiyê de bûn û helwesta Herêmê ya dûrketina ji şer “biaqilane” bû.

Esedi her wiha îdia kir ku manevrayên leşkerî yên Amerîkayê li Hewlêrê û balona çavdêriyê ya li ser balafirgehê armanca sorkirina Îranê hebûn. Li gorî wî, Îran tevî van çalakiyan ji armancgirtina Hewlêrê dûr ket, ji ber ku dê zirar bigihîje sivîlan.

Vekişîna hêzên Amerîkayê

Derbarê vekişîna hêzên Amerîkayê û Hevpeymanan ji Îraq û Herêma Kurdistanê de, Esedi got ku êdî sedemek tune ye ku Îran Herêma Kurdistanê bixe armanc.

Wî got: “Eger Amerîkî li Îraqê nebin û ji navxweya Îraqê ve êrişî Îranê nekin, ti sedem nîne ku Îran cîrana xwe bike armanc.”

Esedi her wiha îdia kir ku hin saziyên ewlehiyê û CIAyê yên Amerîkayê li herêmê hîn jî çalak in û got ku Îran çalakiyên wan dişopîne.

Îran piştgiriyê dide yekbûna Pêşmerge

Esedi li ser yekbûna hêzên Pêşmerge jî got ku Îran vê gavê piştgirî dike.

Wî îdia kir ku di dîrokê de Îran di nêzîkbûna KDP û YNK û avakirina hevkariyên navbera partiyên Kurd de rolek lîstiye.

Komên Kurd ên dijberî Îranê

Esedi komên Kurd ên dijberî Îranê yên li Herêma Kurdistanê bi çalakiyên çekdarî li dijî Îranê tawanbar kir.

Wî got ku ji bo çareserkirina vê pirsgirêkê, Îran amade ye bi Îraq û Herêma Kurdistanê re di çarçoveya komîteyên ewlehiyê de hevkarî bike.

Esedi daxwaz kir ku van civînan neyên paşxistin û got ku pirsgirêk divê bi rêya hevahengiya ewlehiyê were çareserkirin.

Têkiliyên bazirganiyê berdewam in

Esedi got ku tevî şer, bazirganiyê û çûnûhatina di navbera Îran û Herêma Kurdistanê de berdewam bûye.

Wî diyar kir ku bazirganiya navbera her du aliyan ji bo her du aliyan jî girîng e û got ku Îran dixwaze astengiyên li pêşiya bazirganiya sînorî kêm bike.

Derbarê pêvajoya danûstandinên Tirkiye û PKKê de jî Esedi got ku ev mijar “pirsgirêkeke navxweyî ya Tirkiyeyê ye” û Îran piştgiriya her gavê dike ku ewlehiya herêmê xurtir bike.