Kalin û Şer civiyan: HSD û vegera penaberan hatin gotûbêjkirin

Li gorî agahiyên ku Ajansa Anadoluyê ji çavkaniyên ewlehiyê wergirtine, di hevdîtina Serokê Îstixbarata Tirkiyeyê (MÎT) Îbrahîm Kalin û Serokkomarê Sûriyeyê Ehmed Şer de mijarên ewlehiya dualî û herêmî hatine gotûbêjkirin.

Di hevdîtinê de tekezî li ser yekparçeyiya axa Sûriyeyê, serwerî, aramiya siyasî û aştiya civakî hatiye kirin û hatiye destnîşankirin ku Tirkiye dê her tim li kêleka Sûriyeyê be.

Li gorî agahiyan, “di hevdîtinê de behsa têkoşîna hikûmeta Sûriyeyê ya li dijî gefên navxwe û derve hat kirin û hat gotin ku Tirkiye amade ye her cure piştgiriya ku birêvebiriya Şamê pêwîstî pê hebe, bide”.

Di hevdîtinê de têkoşîna li dijî DAIŞê jî hatiye gotûbêjkirin û mijarên wekî bipêşxistina kapasîteya li Sûriyeyê, ewlehiya sînoran û deriyên gumrikê, başkirina şert û mercên aborî û vegera ewle ya penaberên Sûriyeyî hatine nirxandin.

Li aliyê din, Serokkomariya Sûriyeyê ragihand ku di hevdîtinê de “Peymana 10ê Adarê ya di navbera HSD û birêvebiriya Şamê de” hatiye gotûbêjkirin û Kalin “tekezî li ser yekparçeyiya axa Sûriyeyê kiriye”.