Nêçîrvan Barzanî: Şoreşa Îlonê ji bo vejînê ruhekî nû da ber Kurdistaniyan

Îro 64 sal di ser Şoreşa Îlonê re derbas bûn.

Serokê Herêma Kurdistanê Nêçîrvan Barzanî ji bo salvegera Şoreşa Îlonê peyamek belav kir û got: 

"Îro di bîranîna 64emîn a Şoreşa Mezin a Îlonê de, em Rêberê şoreşê û gelê Kurdistanê, Barzaniyê Nemir û hemû serkirde, Pêşmergeyên qehreman û dilsoz ên Kurdistanê bi rêz bi bîr tînin ku beşdar, hevpar û hêz û bazûya şoreşê bûn.

Dirûd ji bo ruhê pak ê şehîdan û silav li malbat û kesûkarên wan ên serbilind.

Şoreşa Mezin a Îlonê di serdemeke aloz û dijwar de ku ji her alî ve zilm û înkar li gelê Kurdistanê dihat kirin, bû nasname û bingeha bîra neteweyî û niştimanî, ruhekî nû ji bo vejîn û rûbirûbûnê da ber Kurdistaniyan.

Bû sîwana komker a hemû çîn û pêkhateyan û dengê rewa, wêrek û hawara maf û azadiya gelê Kurdistanê gihand tevahiya cîhanê û wekî gelekî zindî, jiyandost û aştîxwaz derket holê.

Di vê bîranînê de em tekezî li ser armanc, prensîp û nirxên bilind ên şoreşê yên wekî azadî, demokrasî, bihevrejiyan, hevdûqebûlkirin, lêborîn û aştiyê dikin.

Wekî ku Şoreşa Îlonê şoreşa hemû pêkhateyên Kurdistanê bû, hemûyan bi hev re yekrêz û hevdeng ji bo yek armancê xebat kir û qurbanî dan, îro jî ji bo parastina maf û destkeftiyên xwe divê em hemû bi hev re kar bikin heta ku em gel û welatê xwe digihînin keviya aramiyê.

Bilind û bi rûmet be bîranîna Şoreşa Îlonê, silav û dirûd li ruhê pak ê şehîdan."

Şoreşa Îlonê

Berî 64 salan, 11ê Îlona 1961ê gelê Başûrê Kurdistanê bi rêbertiya Mele Mistefa Barzanî li dijî hikûmeta wê demê ya Îraqê dest bi xebat û şerê çekdarî kir.

Ew xebat di nava tevgera siyasî û rizgarîxwaziya gelê Kurd de wekî Şoreşa Îlonê tê naskirin.

Artêşa Îraqê 11ê Îlona 1961ê li herêma Bazyan, Geliyê Xelkan û Dihokê dest bi êriş û bombebaranan kir.

19ê Îlonê Ofîsa Siyasî ya Partiya Demokrat a Kurdistanê (PDK) jî li hemberî êriş û bombebaranan biryara parastinê da.

Şoreşê meha Îlona 1961ê bi rêbertiyê Mele Mistefa Barzanî li dijî artêşa Îraqê dest pê kir.

Şoreşê heta Peymana Cezayîrê ya sala 1975an berdewam kir.