Wan di nava du rojan de du caran hejiya

Navenda Şopandina Erdhejan a Rasatxaneya Kandilliyê, li ser hesabê xwe yê medya civakî ragihand ku îro Yekşemê 2ê Çileya 2023an di demjimêr 08:44 de li navçeya Tuşba ser bi parêzgeha Wanê erdhejeke bi hêza 4.1 pile çêbûye û li navçeyên derdorê jî hest bi erdhejê hatiye kirin. Li gor ku saziya navborî dibêje erdhej di kûrahiya 5 kîlometreyan de çêbûye.

Her wiha Rêveberiya Karesat û Rewşên Bilez a Tirkiyê (AFAD) jî ragihandiye ku di demjimêr 08:44 de li navçeya Tuşba ya ser bi parêzgeha Wanê erdhejeke bi hêza 3.9 pile çêbûye.

Derbarê zerarên erdhejê de ti agahî ji aliyê saziyên fermî û rayedarên hikûmetê ve nehatine dayîn.

Li gor zanyariyên Rasatxaneya Kandilliyê doh 1ê Çileya 2023an jî li heman parêzgehê bi hêza 3.1 pileyên rîxterê erdhejek çêbûbû û kûrahiya wê jî 5 kîlometre bûye.