Mesrûr Barzanî pêşwazî li Duchess Sophie, endama malbata şahê Brîtanyayê kir

Di civînê de ku Balyozê Brîtanya li Iraqê û Konsulê Giştî yê Brîtanya li Herêma Kurdistanê amade bûn, Serokwezîr amaje bi pêwendiyên dostane û taybet ên di navbera Herêma Kurdistanê û Brîtanyayê de kir û spasî berdewamiya hevkariyên Brîtanyayê li Herêma Kurdistanê kir, bi taybetî di warê şerê li dijî terorê de.

Duchess Edinburgh, kurteyek li ser kar û çalakiyên xwe û armanca serdana xwe bo Herêma Kurdistanê pêşkêş kir, ku pêşxistina parastina mafên jin û zarokan û nehiştina tundûtûjiya li ser wan e, bi taybetî li deverên ku ji şer û nearamiyê bandor bûne, di nav de jin û zarokên Êzidî yên qurbaniyên terorîstên DAIŞê. Di vê derbarê de tekezî li ser pêşxistina çanda rêzgirtina li mafên mirovan bi giştî û parastina mafên jin û zarokan hate kirin.

Serokwezîr Mesrûr Barzanî pabendbûna Hikûmeta Herêma Kurdistanê bi pêşxistina pirensîpên wekheviya cenderî û rûbirûbûna her cure tundûtûjî û cudahiya li dijî jinan dubare kir.

Rewşa pêkvejiyana aştiyane ya di navbera pêkhateyên cuda yên Herêma Kurdistanê de û baştirkirina kalîteya xwendinê û dabînkirina xwendina jin û zarokan, mijareke din a hevdîtinê bû.