Bi fermana Rêberê Olî yê Komara Îslamî ya Îranê Elî Xamineyî, Emîr Xatemî wekî Sererkanê nû yê artêşa Îranê hat tayînkirin.
Xatemî di navbera salên 2013-2021an de Wezîrê Parastinê yê Îranê bû.
Elî Xamineyî di biryara fermî de diyar kir ku bingeha tayînkirina Xatemî “fedakarî, jêhatîbûn û tecrûbeya wî” ye.
Piştî kuştina Mihemed Husên Baqirî, Xamineyî Ebdulrehîm Mûsevî wekî Sererkanê nû yê artêşa Îranê tayîn kiribû.
Çi bûbû?
Îsraîlê doh destê sibehê nêzîkî saet 03:01ê bi mûşekan tesîsên nukleerî û baregehên leşkerî yên Îranê bombebaran kirin.
Wezareta Parastinê ya Îsraîlê ragihand, di encama êrişa wan a asmanî ya berfireh a li ser çend herêmên cuda yên Îranê de, piraniya fermandarên bilind ên Hêza Asmanî ya Supaya Pasdaran hatine kuştin.
Di êrişan de kuştina Fermandarê Supaya Pasdaran Husên Selamî û Sererkanê Giştî yê Îranê Mihemed Baqirî hat piştrastkirin.
Ajansa Tesnîmê ya Îranê navên zanayên nukleerî yên ku hatine kuştin jî ragihand ku wiha ne:
“Ebdulhemîd Menûçehr, Ehmed Riza Zulfikarî, Emîr Husên Fiqhî, Motlabîzade, Mihemed Mehdî Tehrançî û Fereydûn Ebasî.”
Artêşa Îsraîlê diyar kiribû ku Fermandarê Hêza Asmanî û Fezayê ya Supaya Pasdaran Emîr Hacizade jî hatiye kuştin.
Li hêla din, êrişa Îsraîlê bû sedema bertekên herêmî û navneteweyî.
Serokê Amerîkayê Donald Trump ragihand ku ew ji êrişa Îsraîlê ya li Îranê agahdar bûye û diyar kir ku ew dê destûrê nedin ku Îran bibe xwediyê çekên nukleerî.
Îranê dest bi êrişa bersivdayînê kir û mûşekên wê gihiştin Îsraîlê.
Divê were gotin ku Îranê jî bi mûşek û dronan bersiv da êrişên Îsraîlê.
