Erdogan: Karên komîsyonê gihiştiye qonaxeke giring
Serokomarê Tirkiyeyê Recep Tayyîp Erdogan ragihand, "pêvajoya aştiyê" bi xebatên komîsyonê gihiştiye qonaxeke girîng. Erdogan herwiha tekez kir, hikûmet û hemû alî bi berpirsiyarî tevdigerin û hişyarî da ku her aliyê hewl bide pêvajoyê têk bide, "dê bacê bide".
Erdogan îro 2ê Îlonê di daxuyaniyên xwe yên di firokeyê de dema ji Çînê vedigeriya diyar kir, hikûmet û hemû alî dixwazin pirsgirêka çil salan bidawî bikin û di vê mijarê de berdewam in.
Erdogan herwiha got: "Me nexşerêya xwe û armanca xwe bi awayekî zelal daniye. Çavkaniyên ku heta niha ji bo şerê li dijî terorê hatine xerckirin, dê ji niha û pê de ji bo berhemanîn, geşedan, veberhênan û derfetên kar bên bikaranîn." Erdogan destnîşan kir ku bi serkeftina pêvajoyê, dê hemû Tirkiye û navçe sûdê werbigirin.
Erdogan di berdewamiya axaftina xwe de peyama "biratiyê" da û wiha axivî: "Kurd li ku derê bijîn birayên me ne. Kes nikare me ji hev cuda bike. Çawa ku goşt û hestî ji hev venaqetin, biratiya me jî wisa ye."
Derbarê rewşa Sûriyeyê de, Erdogan got ku ew dixwazin Sûriye bi hemû pêkhateyên xwe yên wekî Ereb, Kurd, Elewî û Xiristiyan di nava yekîtiyê de bijî.
Erdogan got, gelek alî hene dixwazin qeyrana Sûriyeyê berdewam be, lê ji ber vê ew ti carê Sûriyeyê bi tenê nahêlin û ewê wî welatî rakin ser pêyan.
Nûvekirina herî dawî: 02:50:10
