Ocalan li ser pêvajoyê daxuyaniyeke nû da

Heyeta Îmraliyê piştî hevdîtina xwe ya bi Rêberê PKKyê Abdullah Ocalan re daxuyanî da.

Di daxuyaniyê de hat gotin ku Ocalan diyar kiriye ku ji bo çareseriyê pêwîstî bi "qonaxeke nû" û "gavên lezgîn" heye.

Heyeta ku ji Pervîn Buldan, Mîthat Sancar û Faîk Ozgur Erol pêk tê, roja 28ê Tebaxê li Girava Îmraliyê 3 saetan bi Ocalan re civiyabû.

Daxuyaniya Heyeta Heyeta Îmraliyê wisa ye:

“Di 28ê Tebaxa 2025an de me li Îmraliyê bi Birêz Ocalan re hevdîtineke sê saetan pêk anî. Tenduristî û moralê Birêz Ocalan gelek baş bû.

Di hevdîtinê de, wî derbarê qonaxên ku Pêvajoya Aştî û Civaka Demokratîk tê re derbas bûye û asta ku gihiştiyê de nirxandinên berfireh kir.

Wî anî zimên ku pirsgirêka em dijîn bi qasî ku midaxaleyeke cerahî ya taybet jê re pêwîst bike bûye kangren û diyar kir ku wan bi vê hesasiyetê pêvajo meşandiye û anîne heta roja îro.

Wî got, armanca me ew bû ku ji bo bidawîkirina pêvajoyeke biêş, tişta ji destê me tê em bikin.

Wî diyar kir ku civaka demokratîk, aştî û entegrasyon sê têgehên sereke (kilît) yên vê pêvajoyê ne û li ser vî esasî dikare bigihîje encamê.

Ji bo vê yekê, wî tekezî li ser pêwîstiya qonaxeke nû kir ku tê de di hemû waran de gavên lezgîn bên avêtin.

Birêz Ocalan diyar kir ku terciha wî her tim komareke demokratîk û entegrasyoneke li ser bingeha civaka demokratîk bûye û anî zimên ku fêmkirina vê hamleya stratejîk û xwedîderketina li wê, dê bi me hemûyan û bi hemû Tirkiyeyê bide qezenckirin.

Eşkere ye ku girtina dest a vê tercihê ji aliyê hin derdorên siyaset û çapemeniyê ve bi nêzîkatiyên wekî hêsankirin an jî tinehesibandinê, zererê dide vê pêvajoyê.

Bi vê wesîleyê, wî baweriya xwe ya mezin a bi dostaniya bêdawî ya di navbera gelan de û bi aştiyê careke din anî zimên.”