Heyeta Îmraliyê li ser hevdîtina Ocalan daxuyanî da

Di daxuyaniyê de hat ragihandin ku Ocalan ji bo çareseriya pirsgirêkan demokrasiya muzakereyê wekî rêbazeke bingehîn destnîşan kiriye û gotiye ku divê sedsala nû ya Komara Tirkiyeyê li ser bingeha hiqûqa aştî û demokrasiyê bê avakirin.

Daxuyaniya DEM Partiyê wisa ye:

“Di 3yê Çiriya Pêşîn a 2025an de, me li Girtîgeha Îmraliyê bi Birêz Abdullah Ocalan re nêzîkî sê saet û nîvan hevdîtinek pêk anî. Birêz Ocalan wekî her carê bi moral, tendurist û bi xwebaweriyeke bilind bû.

Wî anî ziman ku bi Pêvajoya Aştî û Civaka Demokratîk a ku sala borî dest pê kir, li welat şer û pevçûn rawestandiye û pêşî li gelek metirsiyên mezin girtiye û her kesê ku di vê yekê de rola xwe lîstiye, xwedî kedek bi rûmet û mezin e.

Birêz Ocalan got, “Şaristanî piştî sê sedsalên pevçûnên wêranker û windahiyên mezin di şerên cîhanî de, demokrasiya muzakereyî wekî modelekî çareseriyê ya girîng pêş xist.

Bingeha vê rêbazê divê ji bo çareseriya pirsgirêkên Tirkiyeyê yên navxweyî û derveyî esas bê girtin.”

Rêzdar Ocalan pêşniyaz kir ku di hemû têkiliyên siyasî û civakî de muzakereya demokratîk serdest be.

Birêz Ocalan, daxuyaniya 27ê Sibatê bi bîr xist û got, “Em li pişt gotina xwe ne ku pêşveçûna vê pêvajoyê bi pêwîstiyên siyasî û hiqûqî ve girêdayî ye” û destnîşan kir ku di qonaxa gihîştî de, tespîtkirin û cîbicîkirina pêwîstiyên hiqûqî bi nêrîneke rast û yekgirtî gelekî girîng e.

Taliyê Birêz Ocalan anî zimên ku divê sedsala nû ya Komarê li ser bingeha hiqûqa aştî û demokrasiyê bê avakirin.”