Serokwezîr Mesrûr Barzanî Cîgirê Rêveberê Kompaniya Somoyê diyar kir

Serokwezîrê Herêma Kurdistanê Mesrûr Barzanî, Hemdî Şingalî ji bo postê Cîgirê Rêveberê Kompaniya Somo diyar kir û piştî rizamendiya Serokwezîrê Iraqê û derkirina fermana wezarî ji aliyê Wezareta Petrolê ya Iraqê ve, li Kompaniya Somo dest bi kar kir.

Roja Pêncşemê 3ê Tebaxa 2023an, Berdevkê Hikûmeta Herêma Kurdistanê Pêşewa Hewramanî ragihand: “Li gor rêkeftina Hikûmeta Herêma Kurdistanê û Hikûmeta Federal, ji bo ku Kompaniya Somo rewatiya federaliyê wergire û nûnerê Herêmê di nav rêveberiya kompanyayê de amade be, Serokwezîr Mesrûr Barzanî Dr. Hemdî Îlyas (Hemdî Şingalî) wek Cîgirê Rêveberê Kompanyaya Somo diyar kir.”

Pêşewa Hewramanî her wiha ragihand: “Piştî rizamendiya Serokwezîrê Iraqê Mihemed Şiya Sûdanî, Wezareta Petrolê ya Iraqê fermanek derxist û wî di Kompaniya Somoyê de dest bi kar kir.”

Dr. Hemdî Şingal di Kabîneya Nehem a Hikûmeta Herêma Kurdistanê de wekî nûnerê taybet ê Serokwezîrê Herêma Kurdistanê ji bo karûbarên pêwendiyên welatên Erebî hatibû destnîşankirin û berê jî, Rêveberê Giştî yê Pêwendiyên Navdewletî yê Encûmena Asayîşa Herêma Kurdistanê bû û xwedî doktoraya yasaya avakirina dewletê ye.