Şervanekî Kurd hat revandin û serê wî hat jêkirin

Nûçegihan aajansa Rûdawê ya Rojavayê Kurdistanê Vîviyan Fetahê da zanîn ku komeke çekdar ev şervanê ji bajarê Hisîçayê kuştiye.

Navê wî Samî Şêxmûs Heso ye û bi nasnavê "Sîpan" dihat naskirin.

Sîpan li Taxa Muftiyê ya bajarê Hisîçayê dijiya.

Hinek çekdaran ew revandiye û biriye ser rêya Dêrezorê.

Çekdaran li wir bi kêrê ew kuştiye û pişt re jî gule li termê wî reşandine.

Heta niha ti koman berpirsyariya vê kuştinê nexistiye stûyê xwe.

Vîviyan Fetahê diyar kir ku nîvê şevê termê wî anîne Hisîçayê û dê li wir were veşartin.

"Divê tawanbar bên cezakirin"

Birayê Sîpan daxuyaniyek belav kir.

Wî ji rayedarên Rojavayê Kurdistanê, aliyên pêwendîdar ên Sûriyeyê û ji hemû aliyên xwedîbandor xwest ku ji bo eşkerekirina vî sûcî û darizandina tawanbaran gavên cidî bavêjin.

Di daxuyaniyê de hat gotin ku Sîpan Heso "bi awayekî hovane hatiye şehîdxistin" û hat diyarkirin ku divê ev tawan bê ceza nemîne.

Divê were gotin ku Sîpan berê şervanekî Hêzên Sûriyeya Demokratîk (HSD) bû û di çarçoveya entegrasyonê de tevlî Lîwaya Hesekê ya Artêşa Sûriyeyê bûbû.

Samî Heso kî ye?

Nav: Samî Şêxmûs Heso

Nasnav: Sîpan Hesekê

Kar: Leşkerê Lîwaya Hesekê ya Artêşa Ereban a Sûriyeyê.

Temen: 26 sal

Malbat: Berê du birayên wî yên bi navên Husên û Sîpan di şerê li dijî DAIŞê de şehîd ketine. Piştî şehadeta birayê xwe Sîpan, wî navê wî wekî nasnav ji bo xwe hilbijartiye. Dê û bavê wî jî wefat kiriye. Niha 5 xwişk û 7 birayên wî hene.