Balafirên sotemeniyê gihîştin Rojhilata Navîn: Dîrok dubare dibe?

Li gorî kovara The Newsweek, ev yek ji mezintirîn operasyonên şandina balafirên sotemeniyê ye ku di mehên dawî de hatiye kirin.

Ev tevgera leşkerî wekî nîşaneke zêdebûna berbiçav a amadehî û hişyariya leşkerî ya Amerîkayê li herêmê tê dîtin, di demekê de ku alozî li gel Îranê zêde dibin.

Balafir li Qeterê tên bicihkirin

Agahiyên ji satelaytan û saziyên çavdêriya balafiran nîşan didin ku balafir ji baregehên li Okyanûsa Atlantîkê firiyane û dê li Baregeha Asmanî ya Udeydê ya li Qeterê dakevin ku baregeha Fermandariya Navendî ya Hêzên Amerîkayê (CENTCOM) lê ye.

Bîranîna şerê berê: Gelo dîrok dubare dibe?

Bicihkirina ji nişka ve ya bi dehan balafirên tanker ên KC-135 di demekê de ye ku herêm di rewşeke gelekî nearam de ye.

Berê, rasterast beriya şerê 12 rojan ê di navbera Îsraîlê de û êrişên Amerîkayê yên li ser Îranê û tesîsên wê yên atomî, tevgerên leşkerî yên berfireh ên bi vî rengî hatibûn dîtin.

Alozî ji ber rawestandina dan û standinên atomî yên li gel Tehranê û berdewamiya cezayan zêdetir bûne, ku ev hemû metirsiya derketina şerekî nû zêde dikin.

Balafirên sotemeniyê berê xwe didin Baregeha Udeydê

Her çend hejmara teqez a balafiran ne diyar be jî, daneyên çavdêriya balafirvaniyê zêdebûneke berbiçav a balafirên cureyê KC-135R/T yên ku li Baregeha Udeydê daketine, piştrast kirine.

Wekî baregeha herî mezin a Amerîkayê li herêmê, bihêzkirina vê bingehê tê wateya zêdekirineke berbiçav a şiyana artêşê ya ji bo pêkanîna operasyonan.

Hesabê "Defence_Index" li ser tora civakî ya Xê nivîsandiye: "Nêzîkî 12 balafirên tanker ên KC-135 Stratotanker û balafirên din ên sotemeniyê yên Hêza Asmanî ya Amerîkayê ku di nav 48 saetên borî de ji bo Ewropayê hatibûn veguhastin, niha ber bi Rojhilata Navîn ve diçin."

Di postê de her wiha hatibû gotin ku tevgera herî dawî ya bi vî rengî hevdem bû bi êrişên Amerîkayê yên li dijî tesîsên atomî yên Îranê re.

Îran: Em amade ne xwe biparêzin

Îranê tekez kir ku ew amade ye parastinê xwe bike, di heman demê de aşkera kir ku ew dê destpêşxeriya şer neke.

Alîkarê Mufetîşê Îranê Mihemed Cefer Esedî got, Tehran dê menzîla mûşekên xwe "bigihîne her cihê ku pêwîst be" û tekez kir ku eger êrişî wan were kirin welatê wî dê bersiveke diyarker bide.

Roja yekşemê, Fermandarê berê yê Artêşa Pasdarên Îranê Muhsîn Rezaî hişyarî da û got ku tenê êrişeke Îsraîlê jî dikare bibe sedema derketina şerekî giştî ku dê Amerîkayê jî li xwe bigire.

Enstîtuya Lêkolînên Şer hişyariyê dide

Ev hişyarî û komkirina hêza leşkerî ya Amerîkayê di demekê de ye ku Enstîtuya Lêkolînên Şer (ISW) hişyarî daye ku îhtimala berdewamiya agirbesta di navbera Îran û Îsraîlê de nîne û dibe ku şer ji nû ve dest pê bike.

Di raporê de hatibû gotin ku Encumena Bilind a Ewlehiya Niştimanî ya Îranê erk daye berpirsan ku ji bo parastina berdewamiya serkirdatiyê di rewşeke şer de, cîgiran ji bo xwe diyar bikin.

Piştî vê dê çi biqewime?

Bicihkirina balafirên sotemeniyê yên Amerîkayê û hişyariyên Îranê nîşana destpêkirina qonaxeke nû ya amadehî û tundkirina tedbîrên çavdêriyê ne li Rojhilata Navîn.

Çav li ser tevgerên zêdetir ên balafir û hêzên leşkerî yên Amerîkayê ne, di heman demê de daxuyaniyên Tehranê nîşan didin ku ew amade ye bi lez bersiva her gefeke çaverêkirî bide.