Hollywood û Netflix berê xwe didin Keleha Zêrzevanê

Serokê Xebatên Kolîna Keleha Zêrzevan û Perestgeha Mîtrasê Kolyarnas Aytaç Coşkun ji Kurdistan24ê re ragihand, di demên dawîn de Kompaniyên Fîlman ên Hollywoodê û Netflixê ji bo kêşana fîlman serî li Wezareta Çand û Geştiyariya Tirkiyeyê dane.

Keleha Zêrzevanê û Perestgeha Mîtras ji roja ku hatine kifşkirin ve bala hemû cîhanê dikêşin û her ku diçe serdêrên van şûnwarên dîrokî zêdetir dibin.

Serokê Xebatên Kolîna Keleha Zêrzevan û Perestgeha Mîtrasê Kolyarnas û Akademîsyenê Zanîngeha Dîcleyê Aytaç Coşkun ji Kurdistan24ê re aşkere kir ku di demên dawîn de Kompaniyên Fîlman ên Hollywoodê û Netflixê ji bo kêşana fîlman serî li Wezareta Çand û Geştiyariya Tirkiyeyê dane.

Aytaç Coşkun da zanîn ku niha 3 serîlêdan hene û hîn biryara dawî nehatiye dayîn û got: “Ji bo ku li Keleha Zêrzevanê û Perestgeha Mîtrasê sînema an jî belgefîlm werin kêşan ji kompaniyên fîlman ên Hollywoodê û Netflixê 3 serîlêdan bo Wezareta Çand û Geştiyariya Tirkiyeyê hatine kirin û hîn jî serîlêdan tên nirxandin.”

Coşkun herwiha ragihand: “Em niha xalek pêşwazîkirina mêvanan li kelehê çêdikin û em bawer dikin ku îsal hejmara geştiyaran bibe 600-700 hezar û sala bê jî em pêşbînî dikin ku ev hijmara bibe 1 milyon.”