Nêçîrvan Barzanî: Kurdistan dê her dem landika bihevrejiyanê be

Nêçîrvan Barzanî di peyama xwe de pîrozbahiyên herî germ li hemû Xiristiyanên Kurdistan, Îraq û cîhanê kirin.

Serokê Herêma Kurdistanê Nêçîrvan Barzanî di peyama xwe ya ku li ser hesabê xwe yê tora civakî Xê belav kiriye de wiha got:

"Bi boneya Cejna Jidayîkbûna Hezretî Mesîh, ez pîrozbahiyên herî germ li xwişk û birayên me yên Xiristiyan ên li Herêma Kurdistanê, Îraq û cîhanê dikim.

Ez hêvîdar im ku ev cejn bi xwe re aştî, aramî û xêr û xweşiyê bîne."

Nêçîrvan Barzanî di berdewamiya peyama xwe de tekezî li ser çanda bihevrejiyanê kir û got:

"Di vê boneyê de em tekez dikin ku Herêma Kurdistanê wekî her car dê landika bihevrejiyan, lêborîn û hevtemamkirina navbera hemû pêkhateyên olî û neteweyî bimîne.

Em hemû welatiyên xwe yên Xiristiyan piştrast dikin ku em dê berdewam parêzerên maf û azadiyên wan bin."

Serokê Herêma Kurdistanê hêvî xwest ku sala nû bibe sala bidawîhatina şer û aloziyan û aramî li cîhanê serdest bibe.