HPGê û artêşa Tirkiyê amarên şer belav kirin

HPGê di daxuyaniya xwe ya îro 4ê Îlona 2022an de ragihandiye, gerîlayên wan li navçeyên Xakurk û Zapê ji 1ê Îlonê heta 3ê Îlonê 18 êrîş li dijî leşkerên artêşa Tirkiyê pêk anîne û di wan êrîşan de 21 leşkerên Tirkiyê kuştine.

HPGê herwiha îdia kiriye ku di êrîşekê de helîkoptreke artêşa Tirkiyê ya ji corê Skorksy hatiye xistin. Lê artêşa Tirkiyê û Wezareta Berevaniya Tirkiyê derbarê wê yekê de tiştek negotine û ti aliyekî din ev îdiaya HPGê piştrast nekiriye.

Li aliyê din Wezareta Berevaniya Tirkiye herî dawî roja Înê 2ê Îlona 2022ê ragihandiye, 3 gerîlayên PKKê li navçeya operasyona Pence Kilîd hatine kuştin.

Wezareta Berevaniya Tirkiyê herwiha roja Pêncşembê 1ê Îlona 2022an di daxuyaniyekê de kuştina leşkerekî xwe li navçeya operasyona Pence-Kilîd ragihandibû.

Di daxuyaniyê de hatibû gotin, leşkerê bi navê “Okan Meteoz” di encama “teqîna bombeyekê” de li devera Zap-Avaşîn hatiye kuştin.

Roja 31ê Tebaxê jî Wezareta Berevaniya Tirkiyê dabû xuyakirin, ku di êrîşeke esmanî ya artêşa wî welatî de 2 gerîlayên PKKê li navçeya Avaşîn canê xwe ji dest dane.

Artêşa Tirkiyê roja 17ê Nîsana 2022an di nav axa Başûrê Kurdistanê de bi hinceta hebûna binke û baregehên gerîlayên PKKê dest bi operasyona bi navê “Pence-Kilîd” kir û operasyon heta niha berdewam e.

Operasyona “Pence-Kilîd” navçeyên Metîna, Zap û Avaşîn-Basyanê yên li sînorê qezaya Amêdiyê ve li xwe digire.