Parêzerê Demîrtaş: Eger hikûmet li dijî dernekeve Demîrtaş dê were berdan

Mahsunî Karamanê Parêzerê Hevserokê Giştî yê berê yê HDPyê Selahattîn Demîrtaş diyar kir ku ji bo berdana Demîrtaş 8ê Çiriya Pêşîn a 2025an girîng e.

"Mînaka MHPyê watedar e"

Mahsûnî Karaman da zanîn ku dema îtiraza hikûmetê ya li dijî biryara binpêkirinê ya DMMEyê ya 8ê Tîrmehê, 8ê Çiriya Pêşîn a 2025an bi dawî dibe û got:

"Wekî ku MHPyê ji bo dosyeya Kobaniyê serî li îstînafê neda, watedar e ku hikûmet jî li dijî biryara DMMEyê îtirazê neke."

Karaman di daxuyaniya xwe ya li ser medyaya civakî de wiha got:

"DMMEyê heta niha derbarê birêz Demîrtaşê ku ji 4ê Çiriya Paşîn a 2016an ve girtî ye, 3 caran biryara binpêkirinê daye û xwestiye ku bê berdan lê ev biryar nehatine bicihkirin.

Ew biryar jî ev in, biryara Daîreya DMMEyê ya 20ê Çiriya Paşîn a 2018an, biryara Daîreya Mezin a DMMEyê ya 22yê Kanûna Pêşîn a 2020î û biryara Daîreya DMMEyê ya 8ê Tîrmeha 2025an."

Karaman bi bîr xist ku Dadgeha 22yemîn a Cezayê Giran a Enqereyê serlêdana wan a ji bo berdanê ya piştî biryara dawî red kiribû û wekî hincet gotibû ku biryara DMMEyê "hîn ne misoger e" û "Demîrtaş êdî ne ji ber gumana sûc lê ji ber mehkûmiyetê girtî ye."

"Biryar ji bo hemû siyasetmedaran derbasdar e"

Karaman da zanîn ku biryara DMMEyê ne tenê ji bo Demîrtaş her wiha ji bo hemû siyasetmedarên ku ji Doza Kobaniyê hatine mehkûmkirin jî derbasdar e.

Wî her wiha da zanîn ku wan dosyeya Doza Kobaniyê 24ê Îlona 2025an ji bo lêkolînê şandiye Daîreya 22yemîn a Cezayê ya Dadgeha Edliyeyê ya Herêmê ya Enqereyê.

Banga ji bo pêvajoya çareseriyê

Mahsûnî Karaman di dawiya daxuyaniya xwe de bang kir û got, divê Dadgeha Îstînafê demildest dosyeyê binirxîne û wekî pêwîstiyeke hiqûqê Demîrtaş û hevalên wî berde.

Karaman got, ji bo ku "pêvajoya çareseriyê" ya ku niha tê meşandin baweriyê bide, berdana girtiyên Doza Kobaniyê pêwîst e û tewr neçarî ye.

Karaman her wiha eşkere kir ku ew di wê baweriyê de ku Demîrtaş dê were berdan.