PDK û YNK: Petrol nabe sedema paşxistina serxwebûnê

Fermangeha Welatên Cîran a Wezareta Derve ya Iraqê di raporekî de behsa hûrgûliyên pozberiya Îran û Tirkiyê ya li ser petrola Kerkûkê kiribû û îdîa kiribû, ku ji ber vê pozberiyê di navbera partiyên kurdî de nakokî zêdetir bûne.

Herwiha di raporê de hatibû gotin, ku ev pozberî û nakokî dê bibe sedema paşvexistina serxwebûnê.

Derbarê vê mijarê de Parêzgarê Kerkûkê û Endamê Polîtbûroya Yekîtiya Nîştîmaniya Kurdistanê (YNK) Necmedîn Kerîm ji Rûdawê re got; “Ji bo serxwebûna Kurdistanê hemû kurd yekdeng in. Gelê Kurdistanê dixwaze mafê wê hebe çarenivîsa xwe diyar bike.”

Fermangeha Welatên Cîran a Wezareta Derve ya Iraqê di rapora xwe de amaje bi rapora ajansa Monîtor a amerîkî jî kiribû û gotibû; “Vê raporê hiştiye di navbera aliyên siyasî yên Kurdistanî de pirgirêk kûrtir bibin û kar bigihije wê astê ku hizra perçebûna Herêma Kurdistanê bikeve rojevê. Herêmeke din bê avakirin û Silêmanî, Helebce, Kerkûk û Xaneqîn bikevin nav vê herêma nû. Bi vî awayî desthilata Serokê Herêma Kurdistanê ya berî sifir dibe û ev yek jî hemû projeyên serxwebûnê paşve dixe.”

Berpirsê Eniya Rojavayê Kerkûkê û Endamê Polîtbûroya Partiya Demokrata Kurdistanê (PDK) Kemal Kerkûkî dibêje; “Ev xewna Bexdayê ye. Petrola Kurdistanê ya gelê Kurdistanê ye. Ne yê PDK û YNKê ye. Ji ber vê yekê bi ti awayî nabe pirsgirêk. Gelê Kurdistanê dê referandûma xwe bike, biryara çarenivîsa xwe bide û serxwebûna xwe rabigihîne.”

Ev rapora Fermangeha Welatên Cîran a Wezareta Derve ya Iraqê di demekê de ye, ku Sibata derbasbûyî hêzekî serbazî yê ser bi YNKê biser şîrketa Petrola Bakûr a Kerkûkê de girt û ji bo çend demjimêran hinardekirina petrolê girt. Ev yek bû sedema nîgeraniya hikûmeta Herêma Kurdistanê.

Derbarê rapora Fermangeha Welatên Cîran a Wezareta Derve ya Iraqê de Rûdawê nêrîna hemwelatiyên Başûrê Kurdistanê girt, ew jî ligel aliyên siyasî li ser pirsa petrolê hevdeng in.