PDKÎ: Di encama êrişên Îranê de şehîd û birîndarên me hene

Endamê Desteya Birêvebir û Berpirsê Navenda Pêşmergeyan a PDKIyê Kawa Behramî ji ajansa Rûdawê re got, doh piştî nîvro bi dronan êrişî kampa Cêjnekanê ya li qezaya Behirkeyê ya Hewlêrê hatiye kirin û di encamê de kurê Pêşmergeyekî şehîd ketiye û bavê wî jî birîndar bûye.

Kampa Cêjnekanê kampa malbatên penaberên Rojhilatê Kurdistanê ye.

Kawa Behramî her wiha da zanîn ku her îro bi mûşekan êrişî baregeha partiya wan a li sînorê Xelîfanê ya parêzgeha Hewlêrê hatiye kirin û di encamê de 2 Pêşmergeyên wan ên jin şehîd ketine û Pêşmergeyeke din a jin jî birîndar bûye.

Li hêla din, PDKIyê berî demekê daxuyaniyek belav kir û tê de hat gotin:

"Êrişa bi dronan a Komara Îslamî ya Îranê ya li ser kampên sivîl ên Partiya Demokrat a Kurdistana Îranê ya li Herêma Kurdistanê bû sedema şehîdketin û birîndarbûna çend kesan."

Di daxuyaniyê de wiha hat gotin: "Komara Îslamî ya Îranê piştî nîvroya roja înê, bi mûşek û dronan pêleke nû ya êrişan bir ser kampên sivîl ên PDKIyê.

Ji ber vê yekê bav û kurek şehîd ketin. Di wê êrişê de Şahîn Azerberzîn şehîd ket û bavê wî Nadir Azerberzîn bi giranî birîndar bû.

Di êrişeke din a li ser tîmeke Pêşmergeyên partiyê de, 2 pêşmergeyên jin bi navên Neda Mîrî û Semîra Elahyarî şehîd ketin û çend Pêşmergeyên din jî birîndar bûn."