Serok Barzanî pêşwazî li Konsolê Giştî yê Fransayê li Hewlêrê dike

Di hevdîtinê de ku Berpirsê Fermangeha Peywendiyên Hikûmeta Herêma Kurdistanê Sefîn Dizeyî û Cîgirê Konsolê Giştî yê Fransa Patrice Leroy amade bûn, Konsolê Giştî yê Fransa li Hewlêr, silavên Serok û Wezîrê Derveyê Fransa bi Serok Barzanî gihandin û xweşhaliya xwe jî bi hebûna aramiya li Herêma Kurdistanê û destbikarbûna Hikûmeta nû ya Herêma Kurdistanê nîşan da û tekezî li ser dostayetiya di navbera gelê Fransa û gelê Kurdistanê kir.

Herwiha ev jî bi Serok Barzanî ragihand, ku welatê wan bi erênî ve temaşa baştirbûna peywendiyên di navbera Hewlêr û Bexdayê dike. Herwiha ragihand aramiya Herêma Kurdistanê ji aliyê Fransa ve girîng e û welatê wan dixwaze peywendiyan bipêş bixe û li palpiştîkirina Herêma Kurdistanê de jî berdewam bike.

Ji aliyê xwe ve Serok Barzanî spasî li Serok û Wezîrê Derveyê Fransa kir û hêviya serkeftinê ji bo Konsolê nû yê Fransa li Hewlêrê xwest. Ji bilî balkişandina li ser peywendiyên dostaye û dîrokî yên gelê Kurdistanê û gelê Fransayê, spasî li Serok û Hikûmetên Fransayê kir ku di rojên teng û şerê li dijî DAIŞî de palpiştê gelê Kurdistanê bûne û diyar kir ku li pêşxistina peywendiyên di navbera her du aliyan de tu ban û sînorek tune ye.

Gefa teror û rewşa siyasî û pêşhatên dawî ya li ser asta navçeyê û her wiha rewşa Sûriyê, çend mijarên din ên vê hevdîtinê bûn û Serok Barzanî ji bilî derbirîna palpiştiya xwe ya ji bo destpêşxeriya Serok Macron ya li ser Sûriyê, dilgiranî û têbîniyên xwe jî yên li ser rewş û paşaroja gelê Kurd li Sûriyê bi şanda mîhvan ragihand.