Mesrûr Barzanî: Em hikûmeteke giştgîr, bihêz û yekgirtî dixwazin
Serokwezîrê Herêma Kurdistanê Mesrûr Barzanî duh roja 6ê Mijdarê bi Balyozê Brîtanyayê li Iraqê Stephen Hitchens re civiya û tekezî li ser pêkanîna kabîneya nû ya hikûmetê di zûtirîn dem de kirin.
Her di vê hevdîtinê de, behsa hewl û amadekariyên pêkanîna kabîneya nû ya hikûmeta Herêma Kurdistanê, rewşa giştî ya Iraqê û aloziya Rojhilata Navîn kirin.
Balyozê Brîtanyayê proseya birêveçûna hilbijartinên gera şeşem a Parlamentoya Kurdistanê ku bi awayekî aram û bi rêkûpêk birêve çû, bilind nirxand û ji bo serkeftina proseyê pîrozbahî li Serokwezîr Mesrûr Barzanî kir.
Her du aliyan tekezî li ser giringiya pêkanîna kabîneya nû di zûtirîn dem de kirin.
Serokwezîr Mesrûr Barzanî got: “Ti vetoya me li ser beşdariya ti aliyekî nîne û em hikûmeteke giştgîr, bihêz û yekgirtî li ser bingeha encamên hilbijartinan û dengên aliyên siyasî dixwazin.”
Her di vê hevdîtinê de, dabînkirina mafên darayî yên Herêma Kurdistanê û destpêkirina hinardekirina petrola Herêma Kurdistanê, mijarên din ên guftûgoyan bûn.
Nûvekirina herî dawî: 12:08:24
