Mesrûr Barzani: Mamoste di perwerdekirina nifşên me de roleke girîng dilîzin

Di peyama xwe de Serokwezîr Barzanî got: "Bi boneya şêst û sêyemîn salvegera damezrandina Yekîtiya Mamosteyên Kurdistanê, pîrozbahiyê li Serok û endamên Mekteba Sekreteriyê û tevahiya mamosteyên Kurdistanê dikim û hêviya serkeftinê ji wan re dixwazim."

Serokwezîr di berdewamiya peyama xwe de got: "Xebat û têkoşîna Yekîtiya Mamosteyên Kurdistanê û parastina wan a maf û daxwaziyên mamosteyên Kurdistanê bilind dinirxînin û rêzeke me ya mezin ji bo mamosteyên Kurdistanê heye, ku roleke girîng di perwerdekirin û hînkirina nifşên me de dilîzin."

Serokê Hikûmetê herwiha hêviya xwe anî ziman û got: "Hêvîdar im mamosteyên Kurdistanê, li ser bingeheke baş û perwerdeyeke durist û hizreke niştimanperwerî û hezkirina Kurdistanê, nifşeke dahêner û zanistxwaz û jîngehdost pê bigihînin, da ku roleke wan a karîger di pêşxistin û pêşvebirina Kurdistanê de hebe."