PDK nikare biryara hilbijartinan bi tena xwe bide
Partiya Demokrat a Kurdistanê (PDK) daxwaz dike, di zûtirîn dem de hilbijartinên Herêma Kurdistanê bên kirin û di meha bê de jî dema hilbijartinan bê yekalîkirin.
Berpirsê Dezgeha Hilbijartinan a PDKê Xesro Goran ji bernameya «Basî Roj” a K24ê re ragihand, PDKê ne bi derengxistina hilbijartinan re ye û daxwaz dike di meha bê de dema birêvebirina hilbijartinan yekalî bibe.
Got jî: “Em wek PDKê bi wê yekê re bûn ku hilbijartinên Kurdistanê di dema xwe de hatiba kirin, ku pêwîst bû di dawiya sala 2017an de bûba, lê ji ber rewşa Kurdistanê û dagîrkirina Kerkûkê bi taybetî, hilbijartin di dema xwe de nebûn. Em bi wê yekê re ne ku îsal hilbijartinên Kurdistanê berî yên Iraqê bêne kirin, ji ber ku dema parlemanto û hikûmeta niha temam bûne, lê PDKê nikare bi tena xwe wê biryarê bide.”
Amaje bi wê jî da, “Reng e hin aliyên siyasî yên Kurdistanê li benda wê yekê ne, ku di hilbijartinên Iraqê de qebareya xwe û rêjeya dengên xwe bizanin, loma dixwazin hilbijartinên Kurdistanê bekevin piştî yên Iraqê.”
Ev di demekê de, ji du mehan bûrî ve çendîn car in serokatiya hikûmeta herêmê, parlemantoya Kurdistanê û Komisyona Bilind a Hilbijartinên Kurdistanê ji bo diyarkirina roja hilbijartinan civiyan, lê nekarîn biryar wê yekê bidana, ku hilbijartinên Kurdistanê berî yên Iraqê bên kirin.
Nûvekirina herî dawî: 07:54:24
