Şandeya DEM Partiyê îro diçe Îmraliyê

Şandeya DEM Partiyê ya ku wekî Şandeya Îmraliyê jî tê zanîn û ji Parlamenterê Stenbolê Sirri Sureyya Onder û Parlamentera Wanê Pervîn Buldanê pêk tê 28ê Kanûna Pêşîn a 2024an li Girtigeha Girava Îmraliyê bi Abdullah Ocalan re hevdîtin kiribû.

Serokê Şaredariya Bajarê Mezin a Mêrdînê Ahmet Turkê ku li şûna wî qeyûm hatibû danîn jî piştî hevdîtinê tevlî şandeyê bûbû.

Şandeya DEM Partiyê piştî hevdîtina bi Ocalan re bi Serokê Parlamentoya Tirkiyeyê re û ji bilî ÎYÎ Partiyê bi hemû partiyên li parlamentoyê re civiyabû.

Ew şande her wiha çûbû serdana hevserokên berê yê HDPyê Selahattîn Demîrtaş û Fîgen Yuksekdagê.

Şandeyê ji bo hevdîtina bi Ocalan re 20ê Kanûna Paşîn a 2025an serî li Wezareta Dadê ya Tirkiyeyê dabû.

Li gorî nûçeya Ajansa Mezopotamyayê (MA), Şandeya DEM Partiyê ji bo hevdîtina duyemîn a li gel Ocalan dê îro here Girtîgeha Îmraliyê.

Lê nehatiye eşkerekirin ku di nav şandeyê de kî û kî hene.

Yek ji tiştên ku raya giştî meraq dike ew e ku bê ma Ahmet Turk dê di nav şandeyê de cih bigire yan na.