Derbarê Serokê Giştî yê CHPê Ozgur Ozel de lêpirsîn hat destpêkirin

Şaredara Bajarê Mezin a Aydinê ya CHPê Ozlem Çerçîoglu, tevî sê şaredarên navçeyên girêdayî Aydinê, biryar da ku dest ji partiya xwe berdin û beşdarî AK Partiyê bibin. 

Ev pêngav di nava CHPê de bû sedema bertekên tund. Serokê Giştî yê CHPê Ozgur Ozel, derbarê mijarê de daxuyaniyeke tund da û got, AK Partiyê bi dosyeyên gendeliyê gef li Ozlem Çerçîoglu xwariye û jê re gotiye, "yan tu yê beşdarî AK Partiyê bibî, yan jî em ê te biavêjin zîndanê." Ozel da zanîn, Çerçîoglu ji ber tirsa zîndanê ev biryar daye.

Ozel: "Şerm e, ev sîstema reş a AK Partiyê ye"

Ozgur Ozel di axaftina xwe de rasterast Serokomarê Tirkiyeyê Recep Tayyîp Erdogan kir armanc û got: “Erdogan, te sê caran li Aydinê şikest xwariye. Eger tu bi dekûdolaban û bi gefên zîndankirinê bibî xwedî Aydinê, ma ez çi bêjim? Ma camêrî ev e? Baş bizane, ez ê careke din Aydinê bistînim. Şerm e. Ji ber xatirê Kemal Kiliçdaroglu me Ozlem Çerçîoglu kir namzeta şaredariyê, lê ew jî niha radestî AK Partiyê bû. Ev sîstema reş a AK Partiyê ye.”

Serdozgeriyê lêpirsîn da destpêkirin

Piştî van gotinên tund, Serdozgeriya Komarê ya Enqereyê bi tometa "sivikatî û bêrêziya li hemberî Serokomarê Tirkiyê" derbarê Ozgur Ozel de lêpirsîn vekir.

Wezîrê Dadê yê Tirkiyê Yilmaz Tunç jî li ser mijarê daxuyaniyek da û gotinên Ozel weke "derbaskirina sînorên rêzdariyê" û "êrişa ser îradeya 86 milyon welatiyan" binav kir.