Îlham Ehmed: HSD dê weke ‘firqe’ di nav artêşa Sûriyeyê de cih bigire

Îlham Ehmed ji "Ajansa Mezopotamyayê" re da zanîn, di sîstema artêşa Sûriyeyê de yekeyên bi navê "firqe" hene û HSD jî dê bi heman şêweyî xwe ji nû ve birêxistin bike û tevlî artêşê bibe. Lê belê, wê tekez kir ku rola HSDê di nav wezaret û artêşê de, dê bi wan lihevkirinên ku bên kirin ve girêdayî be.

"Divê mafên Kurdan di destûrê de werin parastin"

Ehmed bal kişand ser rewşa Kurdan li Sûriyeyê û got: "Di serdema rejîma Beis de, zimanê Kurdî bi temamî hatibû qedexekirin û siyaseta qirkirina Kurdan dihat meşandin." 

Herwiha hişyarî da jî, eger di destûreke nû de mafên hemû gelan neyên parastin, metirsiyên mezin li ser pêkhateyan hene û got: "Hîn jî zimanê nefretê li dijî Kurdan berdewam e. Divê di destûra nû de mafên hemû gelan, demokratîkbûna Sûriyeyê û nenavendîbûn werin nîqaşkirin."

Astengiyên li pêş Peyama 10ê Adarê

Li ser pirsa derbarê astengiyên li pêşiya cîbicîkirina Peymana 10ê Adarê, Îlham Ehmed got ku astengiya sereke "cudahiya hişmendiyan e." û da zanîn ku her aliyek ji bo entegrasyon û paşeroja Sûriyeyê xwedî nêrîneke cuda ye. Heke diyalog hebe, divê nêrîn jî nêzîkî hev bibin û her aliyek gavekê biavêje."

Îlham Ehmed tekez kir ku eger her aliyek di cihê xwe de bisekine, dê pirsgirêk neyên çareserkirin û got: "Em di vê mijarê de vekirî ne." 

Entegrasyon û rola Amerîkayê

Derbarê entegrasyonê de, Ehmed got: "Amerîka dixwaze di vê mijarê de rola xwe bilîze û zextekê ava dike da ku ev mesele were çareserkirin." Herwiha da zanîn jî, her çend danûstandin bi Şamê re awayekî hêdî dimeşin jî, diyalog didome û kenalên pêwendiyê vekirî ne. Herwiha got: "Ger şaşfêmkirin jî hebin, em ji hev re dibêjin. Em dikarin bibêjin ev tifaq di asteke baş de didome."

Bang li Tirkiyeyê: "Êdî dema guhertina helwestê ye"

Derbarê pêwendiyên bi Tirkiyeyê re, Îlham Ehmed got: "Bi salan e Tirkiye Kurdên li vir weke gef dibîne. Lê êdî dema wê hatiye ku, bi taybetî di çarçoveya proseya aştiyê de, Tirkiye helwesta xwe ya li dijî Kurdan biguherîne. Ne duh û ne jî îro me dijminatiya Tirkiyeyê nekiriye û niyeta me ya şer jî nîne. Berevajî, em dibêjin berjewendiyên me yên hevpar hene û aramîbûna Sûriyeyê rasterast bandorê li ser aramiya Tirkiyeyê jî dike."

Berpirsa Pêwendiyên Derve yên Rêveberiya Xweser da zanîn jî, proseya aştiyê ya li Tirkiyeyê bandoreke erênî li ser Bakur û Rojhilatê Sûriyeyê jî dike û zemîna diyalogê xurtir dike.