Îlham Ehmed: Em pabendî yekparçeyiya Sûriyayê ne

Di civîneke girseyî de ku bi sedan Kurdên li Fransayê beşdar bûn, Îlham Ehmed bal kişand ser geşedanên siyasî yên dawî li Sûriyeyê û rola Kurdan di pêşeroja welat de. Ehmed tekezî li ser destkeftiyên Şoreşa Rojava û girîngiya pêkanîna yekîtiya neteweyî ya Kurdan kir û got: "Pêwîst e nakokiyên navxweyî yên di navbera aliyên Kurdî de bi diyalog û têgihiştinê bên çareserkirin."

Îlham Ehmed da zanîn, ew pabendî lihevkirina 10'ê Adarê ya di navbera Fermandarê Giştî yê Hêzên Sûriyeya Demokratîk (HSD) Mezlûm Ebdî û Serokê qonaxa veguhêz a Sûriyeyê Ehmed Şera de ne. Herwiha destnîşan kir, paşeroja Sûriyeyê bi avakirina çarçoveyeke destûrî ve girêdayî ye ku mafên hemû gel û pêkhateyên welat li ser bingeha wekhevî û dadperweriyê misoger bike.

Hevseroka Desteya Têkiliyên Derve baweriya xwe bi çareseriyên aştiyane anî ziman û wiha pê de çû: "Bi hevkariya hemû pêkhateyan, gelên Sûriyeyê dikarin di nav aştiyê de bi hev re bijîn."

Ev daxuyanî di demekê de tên ku rewşa Sûriyeyê di qonaxeke hestiyar re derbas dibe û gotûbêjên siyasî ji bo diyarkirina paşeroja welat berdewam dikin. Di rojên borî de Ehmed Şer jî ragihandibû ku aliyên navneteweyî ji bo çareseriyeke aştiyane li Bakur û Rojhilatê Sûriyeyê rijd in û danûstandinên wan bi HSD'ê re hene. Şera jî wekî Îlham Ehmed tekez kiribû ku ew her cure dabeşkirina Sûriyeyê red dikin.

Tevî van hevdîtin û daxuyaniyan, heta niha di navbera Rêveberiya Xweser û Şamê de li ser prensîbên bingehîn ên girêdayî mafên Kurdan û awayê rêvebirina Sûriyeya nû lihevkirineke fermî çênebûye.