Rojhilatê Kurdistanê; Di bûyereke trafîkê de 2 kes mirin
Li Rojhilatê Kurdistanê li ser rêya Sine- Merîwanê mînîbusek wergeriya û di encamê de 2 kes mirin û 4 kes jî birîndar bûn.
Ew mînîbus ji gundê Sofiyanê ber bi bajarê Sineyê ve diçû, lê piştî demekê wergeriya.
Di qezayê de 2 welatiyan canên xwe ji dest dan û 4 kesên din jî birîndar bûn.
Serokê Hawarçûnê û Bûyeran ê Zanîngeha Zanistên Pizîşkî ya Sineyê, Riza Pîra ragihandiye, piştî ku ew ji bûyerê agahdar bûne, wan 5 ambulans ber bi cihê bûyerê ve şandine.
Riza Pîra gotiye, destpêkê di bûyerê de 6 birîndar hebûne, ku yek ji wan berî gihîştina ambulansan û tîmên tendirustiyê canê xwe ji dest daye, kesekî din jî di rêya veguhastina bo nexweşxaneyê de miriye.
Fermandarê Polîsên Rêyan ê Parêzgeha Sineyê Îsa Gewherî jî ragihandiye, li gorî lêkolînên destpêkê, ji ber leza zêde kontrola mînîbusê ji destê şofêr derketiye û bûye sedema qezayê.
Her sal hejmareke zêde ya welatiyan di bûyerên trafîkê de li parêzgeha Sineyê jiyana xwe ji dest didin.
Nûvekirina herî dawî: 00:04:38
