Daxwazên Tevgera Goran ji Nêçîrvan Barzanî!

Şanda hikûmeta Herêma Kurdistanê ya di bin serokatiya Nêçîrvan Barzanî de, bi amadebûna Cîgirê Serokwezîr Qubad Talebanî, Wezîrê Çandinî û Çavkaniyên Avê Ebdulsetar Mecîd, Wezîrê Veguhestin û Gihandinê Mewlûd Bawemûrad, Berdevkê Hikûmetê Sefîn Dizeyî û Şêwirmendê Serokwezîr Dilşad Şehab li Girê Zergete ya Silêmaniyê li gel Sekreterê Tevgera Goran Omer Seyîd Elî, Sekreterê Civata Nîştîmanî Cemal Hacî Mihemed û berpirsên din civiya.

Li Silêmaniyê piştî civînê li gorî ragihandina Peyamnêrê Rûdawê : “Tevgera Goran balkişandiye ser hilweşandina hikûmetê û daxwaza biçûkkirina kabîneya hikûmetê jî kiriye.”

Peyamnêrê her wiha daye zanîn ku; “Tevgera Goran xwestiye vê carê şanda Kurdistanê ya diçe Bexdayê şandeke taybet be, şandeke nîştîmanî be, ne ku hizbî.”

Şanda hikûmetê piştî hevdîtina li gel berpirsên Tevgera Goran, çûne Badaşanê û biryare li gel Endama Polîtbûroya YNK'ê Hêro Îbrahîm Ehmed jî bicivin.

Peyamnêr her wiha dibêje ku şanda hikûmetê dixwaze li gel aliyên din jî bicive û ji bo diyarkirina dema hilbijartinan komdengiyekê pêk bîne.

Herwiha hikûmeta Herêma Kurdistanê dixwaze şanda ku diçe Bexdayê şandeke nîştîmanî be û li ser vê yekê jî raya hemû aliyan were wergirtin.