Eşîrên Ereban piştgirî da HSDyê: Em xwedî dozeke hevpar in

Bûyerên xwînrêj ên li bajarê Siwêdayê yên di navbera Durziyan û eşîrên Bedewî û hêzên hikûmeta Şamê de bûn sedema spekulasyonan ku îhtimal heye bûyerên li başûrê Sûriyeyê li Rojavayê Kurdistanê jî ducare bibin.

Ev spekulasyon piştî ku bi hezaran çekdarên eşîrên Ereban ji parêzgehên Heleb, Dêrezor û Reqayê gihiştin eniyên şer ên li Siwêdayê zêde bûn.

“Em rola HSD û Mezlûm Ebdî gelekî bi qîmet dibînin”

Li gorî Şêx Manî Hemîdî Deham el-Cerbayê Şêxê Eşîra Şemeran a Ereban, ne mumkin e ku bûyerên li Siwêdayê bi rewşa herêma Cizîrê re bên girêdan.

El-Cerba ji Şerq el-Ewsetê re axivî û got, “Em rola HSDyê û birêvebirê wê Mezlûm Ebdî ya di pêkanîna lihevkirina siyasî û hevsengiyan de di vê qonaxa dijwar û gelekî hestyar de bi qîmet dibînin.

Bi saya hevkariya me, me karî bigihîjin lihevkirinan ku ji bo herêma me û hemû gelê me wekî serkeftineke dîrokî tên qebûlkirin.”

Eşîra Şemeran a ku piranî li parêzgeha Hisîçayê (Hesekê) ya Rojavayê Kurdistanê ye, girêdayî hêzên Sanadîdê ye ku sala 2013an hatiye avakirin.

Bi texmînî 7-10 hezar şervanên wê hene û li gundên Til Elo û Til Tehmis ên li rojhilatê Qamişloyê bi cih bûne.

Eşîr, li gel komên Ereb ên herêmî yên ji bajarên Reqa û Dêrezorê di nav damezirînerên HSDyê de ye.

“Em xwedî dozeke hevpar in”

Şêx el-Cerba amaje bi “doza hevpar” da wiha li pey gotinên xwe çû:

“Di van salan de, em gihiştin qonaxekê ku me xwe wekî birayên axê bi nav kir.

 Ji ber ku em zarokên heman herêmê ne û em xwedî dozeke hevpar in ku di navbera hemû pêkhateyên vê herêmê de bi ruhê biratiyê yek bûye.”

HSDyê di daxuyaniya xwe ya yekem a Çiriya Pêşîn a 2015an de, xwe wekî “hêzeke leşkerî ya niştimanî ya hevpar ji bo hemû Sûriyeyiyan” pênase kiribû ku “Ereb, Kurd, Suryan û hemû pêkhateyên din ên erdnîgariya Sûriyeyê li hev kom dike.”

Fermandarê Giştî yê HSDyê General Mezlûm Ebdî, 10ê Adarê bi Serokkomarê Sûriyeyê Ehmed Şer re peymanek îmze kiribû da ku hêzên xwe û birêvebiriya sivîl heta dawiya îsal tevlî Wezareta Parastinê û saziyên dewletê bikin.

“Dibe ku senaryoyên cuda derkevin holê”

Lêkolerê Navenda Lêkolînan a Ramanê Bedr Mela Reşîd diyar kir ku HSD ji dema damezirandina xwe ve xwe spartiye hevbendiyên bi meclisên leşkerî yên Ereb ên bi awayê eşîrî û biland:

“Bûyerên li Siwêdayê bê guman dê bandorê li hevbendiyên li bakurê rojhilatê Sûriyeyê bikin.

Dibe ku senaryoyên cuda derkevin holê, dibe ku hikûmeta Şamê hewl bide ku ji rewşa nû sûdê wergire da ku zexta xwe ya li ser HSDyê zêde bike di rewşeke ku aktorekî herêmî tune be.”

“Îhtimala serhildana eşîran dûr e”

Bedr Mela Reşîd amaje bi hewlên Amerîkayê yên ji bo aramkirina rewşê da û îhtimala serhildaneke eşîran a di şert û mercên heyî de dûr dît.

“Tirkiye niha bi pêvajoya aştiyê re mijûl e”

Wî destnîşan kir ku faktorên din jî hene ku rê li ber bigirin ku bûyerên Siwêdayê li Rojavayê Kurdistanê ducare bibin û xwe lê berda:

“Amerîka hewl dide îstiqrara Sûriyeyê biparêze û Tirkiye niha bi pêvajoya aştiyê ya bi PKKyê re mijûl e.

Ji bo ku bandorê li pêvajoya xwe ya navxweyî neke, dê piştgiriyê nede şerekî berfireh li herêmên HSDyê.”

Rêberan bal kişand ser yekîtî û yekparçebûna Sûriyeyê

Li herêmên Cizîr û Firatê yên Rojavayê Kurdistanê bi taybetî eşîrên Ereban ên wekî el-Bekare, Tey, Şemer, Cês, el-Eqîdat, el-Welde û Elbû Şeban dijîn.

Lê belê van eşîran di salên dawî yên şer de hinek caran dubendiyên cidî nîşan dan.

Havîna sala borî, piştî ku Îbrahîm el-Hiflê birayê rêberê eşîra el-Eqîdatê Musab el-Hifl bi piştgiriya rejîma berê ya Sûriyeyê û mîlîsên Îranî, bi hevbendiya bi eşîr û şervanên herêmî re li dijî HSDyê serhildaneke leşkerî da destpêkirin, pevçûnên xwînrêj derketibûn.

Di van pevçûnan de gelek sivîl û çekdar hatibûn kuştin.

Gelo şervanên eşîran dê berê xwe bidin Rojavayê Kurdistanê?

Ekrem Mahşûş ez-Zubayê Serokê Desteya Rîspiyan a Rêveberiya Xweser û şêwirmendê eşîra Ereban a Cabûrê derbarê îhtimala derketina pevçûnekê di navbera HSD û eşîrên herêmî de wiha got:

“Ev bang û tevger nirxên eşîrên Ereban temsîl nakin.

Li vir xwîna pêkhateyên Ereb, Kurd û Xiristiyan di berxwedana dîrokî û têkbirina terora DAIŞê de tevlîhev bûye.

Em dê hemû wekî gelekî yek bimînin û bi welat û hêzên xwe ve girêdayî bin.”

Ez-Zuba diyar kir ku HSD nûnertiya hemû pêkhateyan dike û anî zimên:

“Tevî ku hewlên gelek aliyan ên ji bo fitneyê hene jî em hewlên afirandina şikestineke di navbera pêkhateyên bakur û rojhilat û hêzên leşkerî de red dikin.”

“Em qedera xwe diyar dikin ne rûpelên medyaya civakî”

Ez-Zuba herêmên Rêveberiya Xweser li gorî herêm û parêzgehên din wekî herêmên herî bi îstiqrar nirxandin û destnîşan kir ku ew bi xwe xwediyên axê ne û xwe lê berda:

“Em qedera xwe diyar dikin ne rûpelên medyaya civakî.

Em teqeziyê li ser yekîtî û yekparçebûna axa Sûriyeyê dikin. Kes nikare zimanê xwe dirêjî welatparêziya me bike.”

“HSDyê terorîzm ji holê rakir, ewlehiyê diparêze”

Şêx Hamid el-Feracê şêxê eşîra Ereban a el-Weldeyê ya li Tebqa û Reqayê jî piştgirî da gotinên Şêx el-Cerba û ez-Zuba û piştgiriya endamên eşîrên Ereb ên li herêmên rêveberiya xweser a ji HSDyê re ducare kir û biland:

“Hemû eşîr û pêkhateyên Ereb ên li vir, li dijî hemû ajandayên ku hewl didin ewlehî û îstiqrara herêmên me têk bidin, bi HSDyê re di nav piştevaniyê de ne” û bangî endamên eşîran kir:

“Pêwîst e her kes bibe yek ji bo li hemberî projeyên ku her roj hewl didin îstiqrara li herêmên Rêveberiyê têk bibin rawestin.

HSDyê terorîzm ji holê rakir, ewlehiya xelkê herêmê diparêze û li gorî derfetên heyî hemû xizmetan pêşkêş dike.”