Firseta zêrîn ji dest dihare

Niha mirov baş tê dighêje ku çima kurd heta niha nebûne dewlet. Ji ber ku kurd tim ne li hev in û her gav dijminatiya hev kirine û dikin. Ev sedemeke ji sedemên herî girîng e.

Ez bi xwe gihistim wê qenetê ku heta kurd di vî halî de bijîn wê tu caran jî nebin xwediyê xwe û dewleteke serbixwe. Çi hal e gelo?

Ma ji vê zelaltir hê wê çi halê me kurdan hebe. Niha serxwebûna kurdistanê li ber derî ye, lê weha xuya ye hin kurd û rêxistinên wan bi xwe dixwazin pêhîna xwe lê bide da ku ew serxwebûn nekeve hundir û kurdan hembêz neke.

Niha bala xwe bidinê; demên berê kurd xwedî eşîrên mezin bûn. (hê jî hene lê ne weke zemanê berê ye) Loma dema hin eşîran serî li hember dewletên dagirker rakirina, hin kesayetî û eşîrên din cihê xwe li ba dijmin digirtin û brayê xwe dikuşt. Nedihişt firseta ketiye dest pêk bîne loma jî tim ew firsetên bi destê kurdan diket ji dest diçû.

Piştî têkçûna firsetê her kurdan dikirin hawar û gazî li çongên xwe dixistin ku wan ferseteke dîrokî ji dest dan. Bi vî awayî rewşê her domand, didome û bi vê yekê kurd nebûn xwedî dewlet. Û weha bidome wê nebin jî...

Kurd nebûn xwedî dewlet, loma jî man bindest û gelek ji wan bûne kole û ev koletî hê jî berdewam e. Karê kolan jî ew e ku tim berjewendiyê xwediyê xwe biparêzin. Mejiyê bi salan koletî qebûlkiribe, dê nikaribe ji bona serbestiyê şerê azadiyê û serxwebûnê ji dil li hember dagirkerên xwe bide û wê nexwaze bibe xwedî dewleta xwe jî.

Weke min di serî de jî got ev di dema eşîrtiyan de her weha bû. Her serîhildaneke ji bona azadî û serxwebûna kurdan dibû, hin kurdên din bi xwe li hember derdiketin û dibûn asteng da ku kurd azad nebin û nebin xwedî dewleta xwe.

Niha çi dibe û çi diqewime???

Niha jî şûna eşîrên kurdan, rêxistinên kurdan girtine û her rêxistineke me bû ye eşîretek. Ev eşîret jî li gor berjewendiyên xwe tev digerin. Loma jî tim berjewendiya neteweyî li paş dimîne û ev lipaşmayîn jî nahêle ku kurd bibe xwedî dewleta xwe. Min xwest di vê nivîsa xwe de vê hinekî vekim û vê rastiya niha diyar û eşkereye, vejînim û min xwest bi vê kurdan bi berxim ku divê çi bûye, dibe û wê bibe.

Tê dîtin ku piştî azadiya başûrê kurdistanê û heta niha her kar û xebat hatiye û tê kirin ku wir bibe kurdistaneke serbixwe da ku kurd jî êdî weke miletê vê cîhanê li ser erda û xwe û xwe bi îdare dewleta xwe bi rêve bibe. Ev him heqekî rewa ye him jî mafê her kurdekî ye ku bibe xwediyê dewleta xwe. LÊ.....

Lê tu were binêre ku astengiya herî mezin dîsa ji kurdan de ye. Loma jî metirsîneke mezin heye ku kurd vê firseta ku niha ketiye dest, dîsa weke gelek firsetên din ji dest bidin. Li gor min weha here wê ji dest jî bidin. Çawa?

Bêjim; Ji bona deweleteke serbixwe bê avakirin berî her tiştî divê rêxistin û xelkê wî li hev bin. Ji bona damezrandin û ragihandina dewleta xwe divê xwedî yek helwest bin. Mecbûrin ku nakokiyên nava xwe deynin alîkî, bi hev nebilin û hemû kar tenê ji bona serxwebûnê be.

Ma niha ev li başûrê kurdistanê heye, NA.

Dîsa ji bona miletek dewleta xwe û serxwebûna xwe ragihênî divê ji nava erda wî hin nerin li welatekî din li qereqol û xelkê wî welatî nexin û nekujin û bi şûnde venegere nava erda ew welatê ku dixwaze serxwebûna xwe ragihîne. Ev li başûrê kurdistanê heye? Erê heye û gelekî xurt û bizanetî heye. Kî ne vana? Hûn hemû jî ji min baştir dizanin ku pkk ya ku li qandîlê asê bûye û ji bona kurdan tu tiştekî naxwaze bi xwe ye. Ev jî dibe sedem ku dê kurd nikaribin Kurdistaneke serbixwe li başûrê kurdistanê damezrînin. Ji ber ku dewleteke serbixwe, erkê wê ew e ku divê bikaribe sînorên xwe biparêze. Heger nikaribe vê bike wê gavê dê nikaribe destûra dewleteke serbixwe jî ji qada navneteweyî bigire.

Divê kurd çi bikin?

Berî her tiştî pêwîst e partiyên başûrê kurdistanê li ser asasekî neteweyî li hev bikin, ji bona damezrandina dewleta xwe divê hin şansan bidin hev. Şer û pevçûnên nava xwe rawestînin. Divê li hev vegerin û hemû têkiliyên xwe ji dagirkerên xwe qut bikin. Niha ev li başûrê Kurdistanê heye? Na.

Ya din ji bona serxwebûna başûrê kurdistanê divê qandîl vala bibe, pkk wê vê bike? NA.

Çareserî?

Li gor min çareserî tenê maye ku darbeyeke leşkerî bê kirin, ango pêşmêrgeyên qehreman dest bidin ser her tikştekî hemû hêz û partiyên li dij serxwebûna kurdisanê ne û destê dijmin bi awayekî bi qawet di nava wan deye ji holê bê rakirin ango bêdeng bikin. PIştî vê jî û bi helwesteyeke neteweyî serxwebûna Kurdistanê rahihîne. Ev yek.

Ya dudan heger pkk bi rehetî qandilê biterkîne baş e, heger vê nake divê li hember wan jî şerê ji bona kurdistaneke serbixwe bê dayîn. Ji ber ku pkk tu caran ji demokrasiyê, brayetiya kurdan fêm nekirine û nakin. Ez tu caran bawer nakim ku pkk ji qandîlê bi awayekî rehet û ji bona kurdistaneke serbixwe bi riza dilê xwe wir biterkîne. Loma jî çare tenê dimîne şer. Helbet tercîh ne şer e.

Em dizanin ku kurdan heta niha ji şerê brakujiyê gelek ês kişandinê, lê ev cûda ye ji ber ku ji bona kurdistaneke serbixwe bê ragihandin û kurd bibin xwedî dewleta xwe divê ev bê kirin. Îcar hûn çi navî lê dikin hûn bi kêfa xwe ne.

Bila baweriya we baş hebe ku heger vê carê jî kurd negihêjin serxwebûna xwe, nebin xwedî dewleta xwe, êdî kurd wê tu caran nebin xwedî dewlet. Wê her di bin êş û cefeya dijmin de binale. Wê her wêran bibe, talan bibe û qir bibe.

Li gor min ji bona serxwebûna kurdistanê çi lazim be divê ew bê kirin, bê ku wextê wenda bikin. Roj bi roj şansa kurdan ya ku bibin dewlet kêm dibe, heger hat û di rojhilata navîn de arîşeyên heyî bêne çareserkirin, êdî tu kes û dewlet wê kurdan bi bîr neynin.

Niha kurd xwediyê xwe û rolekî asasî ne. Vê rolê baş nelîzîn ev ê bibe dawiya kurdan û wê êdî tu kurdistaneke serbixwe nebînin...

Em niha wan kesayetî û eşîretên ku li hember miletê xwe ji bona dijmin şer kiribûn, rexne dikin û wan xaîn dibînin. Sibê wê nebiyên me jî van rêxistinên ku niha li dij serxwebûna kurdistanê bûne asteng rexne bikin û wan xaîn bibînin.