Rejîma Komara Îslamiya Îranê xeyal dikir ku bi şehîd kirina Qasimloyê tekoşer, mamostayê demokrasî û dîplomasî û diyalogê, dikare pêşiya xebata azadiya gelê me li Kurdistana Rojhilatê bigre.
Lê belê, kar û xebata Hizba Demokrata Kurdistana Îranê nehişt rejîma Îslamî bigije armanca xwe. Rêvîngên rêbaza Pêşava bi xebat û cangoriya xwe va xeyala rejîma Îranê puç kirin, nehiştin alaya xebata Qasimlo bikeve û nişan dan, ku dagîrker nikarin bi kuştina serok û rêberên Kurd pêşiya xebata azadiya Kurdistan bigrin.
Bi şehîd kirina Qasimlo gelê Kurd li seranserê Kurdistanê rêberê xwe a zana û gernas winda kir. Lê em piştrast in, ku hevsengerên Qasimlo alayê xebat a rêberê xwe hertim bilind radigrin û nahelin sengerê Şehîd Qasimlo vala be.
Em carekî şehid kirina Qasimlo û hevalên wî bi destê terorîstên Cumhuriyeta Îslamiya Îranê mehkum dikin, daxwaz dikin ku hikumeta Avusturya ji xetayê xwe serrast bike û kujerên Qasimlo û hevalên wî eşkere bike û bona bîrûrayê giştî binasine.
Em li ber hizura Qasimlo û hemu şehidên Kurdistanê qirnoş dibin û peyman nu dikin ku rêbazê wan wê berdewam be.
Partiya Sosyalîst a Kurdistan
12.07.2021
