Di dîroka Îraqê de cara yekem: Jineke Kurd bû pîlota kaptan

Rêvebirê Ragihandinê yê Kompanyaya Rêyên Asmanî ya Îraqê Welîd Delfî ji Rûdawê re ragihand, “Rêjîn Mihemed Doskî bû yekem jina Kurd ku di dîroka Îraqê de gihîşt asta pîlota kaptan.”

Herwiha Welîd Delfî got, “Yekem geşta Doskî 19ê Sibatê ji Balafirgeha Bexdayê ber bi bajarê Dubaiyê yê Îmaratê ve bû.

Piştî ku li kompanyaya Rêyên Asmanî ya Îraqê, ji alîkarê kaptan bû kaptana serekê dê ji niha û pê ve bi bi awayekî berdewam geştan bike.”

Rêjîn Doskî ji bajarê Dihokê ye û li Urdinê perwerdeya pîlotiyê qedandiye.

Ji sala 2014an ve di warê veguhastina asmanî de kar dike û 2017an tevlî kompanyaya Rêyên Asmanî ya Îraqê bû.

Sala 2017an balafira Boeingê ji Amerîkayê bir Îzlandayê û ji wir jî bir Bexdayê.

Doskî piştî firîna xwe ya yekem û vegera Balafirgeha Bexdayê, ji aliyê Wezîrê Veguhastinê yê Îraqê Rezaq Seîdawî ve hat xelatkirin.