Ji ber ku PAKê Roja Alaya Kurdistanê, roja 17.12.2022yê li Teşkîlata xwe ya Amedê Alaya Kurdistanê hilda bû, polîsên Emnîyeta Amedê li ser daxwaza Serdozgerê Cûmhûrîyetê yê Amedê û bi biryara dadgehê roja 19.12.2002yê avêtibûn ser avahîya PAKê. Di vê êrîşê da polîsan dest danîbûn ser kompîtirên PAKê , hemû Alayên Kurdistanê, hinek pirtûk û kovaran.
Heyeteke li ser navê Platforma Ked û Demokrasîyê Ya Amedê roja înîyê, 23.12.2022yê, ji bo piştgirîya PAKê , seredana Teşkîlata Amedê ya PAKê kir.
Platforma Ked û Demokrasîyê Ya Amedê ji gelek sendîka û dezgehên sivîl ên Amedê pêk hatîye. Heyeta Platforma Ked û Demokrasîyê Ya Amedê, ya ku seredana PAKê kirin, ji Hevserokê Beşa Amedê ya Odeya Mihendîsên Zîraetê A.Samed Ûçman, ji Komeleya Ekolojîyê Mûrat Bîlgîç, ji Koordînasyona Bajêr a Odeya Mihendîs û Mîmaran Sorgul Aytek, Hevserokê Beşê Amedê ya SESê Şîyar Guldîken, Hevserokê Beşê Amedê yê Egîtîmsen a KESKê Zulkuf Guneş pêk hatibû.
Cîhgirên Serokê Giştî yê PAKê Nurullah Tîmûr û Vahît Aba, endamên Meclîsa Partîyê ya PAKê Husnu Onûk, Mehemt Dortyama, Mehmet Alî Yilmaz, Abdûllah Polat pêşewazîya heyeta Platforma Ked û Demokrasîyê Ya Amedê kirin.
Heyeta Platforma Ked û Demokrasîyê Ya Amedê , di vê seredanê da got ‘’Em vê êrîşa ku li PAKê hatîye kirin protesto dikin û em li gel we ne, em pişgirîya we dikin.’’.
Cîhgirê Serokê Giştî yê PAKê Vahît Aba jî , li ser navê PAKîyan, ji ber vê seredanê û ji ber vê piştgirîya wan a dostane û germ spasîya heyeta Platforma Ked û Demokrasîyê Ya Amedê kir.
Herdu heyetan jî girîngîya berdewamîya peywendîyên herdu alîyan anîn zimên.
Hevdîtina herdu heyetan di atmosfereke dostane û berhemdar da derbas bû.
