Serok Barzanî: Hestên niştîmanperwer li nav nifşên nû de geş bikin

Serokê Herêma Kurdistanê Mesûd Barzanî peyamek pîrozbayî ji ber salvegera 55emîn a damezrandina yekitiya mamostayên Kurdistanê li ser malpera fermî ya Serokatiya Herêma Kurdistanê belav kir.

Mesûd Barzanî di peyama xwe de pîrozbahî li mamosteyên Kurdistanê kiriye û ragihandiye mamosteyan wekî Pêşmerge di xebata rizgarîxwaziya gelê Kurdistanê de beşdarî kirine û bi dehan şehîd dane.

Barzanî wiha got ‘’Bi heman ruhê pêşmergetî li gel krîza darayî û şerê dijî rêxistina terorîst a DAIŞê mamostayan nehêla xwandin li Kurdistanê raweste.’’

Serokê Herêma Kurdistanê diyar kir ku bi saya pêşmerge efsaneya DAIŞê hatiye şikandine û gelê Kurdistanê xwe amade dike gavekê girîng bavêje û pêwîst e mamoste bi ruhê pêşmerge bixebite û hestên niştîmanperwer û kurdewarî li nav nifşên niha de geş bikin.

Barzanî herwiha ji mamosteyên xwest ku divê ew ji nifşên paşerojê re bibêjin ku qurbanî dana gelê Kurdistanê bê encam nabe, bi hêviyeke mezin ve dê ber bi paşerojek geş ve gav bên avêtin.