Li gorî nûçeya Euronewsê Dozgeriya Terorê ya Neteweyî ya Fransayê (Pnat) li ser “komkirina pereyan ji bo alîkariya PKKyê” lêpirsîn da destpêkirin.
Di çarçoveya lêpirsînê de li Parîs û herêma Bouches-du-Rhôneyê 8 kes bi hinceta fînasekirina PKKyê hatin desteserkirin.
Dozgeriya Terorê ya Neteweyî ya Fransayê ragihand, dibe 8 kesên hatin desteserkirin heta 96 demjimêran desteserkirî bimînin û tê gumankirin ku wan kesan di bin navê “baca şoreşê” de ji civaka Kurd a Fransayê pere kom kirine.
Lêpirsîn bi tawanên “Bi armanca amadekirina çalakiyên terorê beşdariya rêxistina tawanê”, “fînansekirina çalakiyên terorê”, “di nav çeteyekî rêkxistî de xesp û hewla xespê” hatiye vekirin.
Tê îdiakirin ku ew çalakî di navbera salên 2020 û 2024an de hatine kirin.
Ji aliyê din ve, li Belçîkayê jî duh polîsan bi ser avahiya televîzyonên Sterk TV û Medya Newsê de girt û li studyoyan geriyan.
Lêgerîna li Sterk TV û Medya Newsê di çarçoveya lêpirsîna li Fransayê de hatiye kirin û Dozgeriya Terorê ya Neteweyî ya Fransayê (Pnat) jî ev tişt piştrast kir.
Fransayê 3 Kurd radestî Tirkiyê kiribûn
Li Fransayê di demên dawî de zexta li ser Kurdên ku ji Tirkiyeyê reviyane zêdetir bûye.
Fransayê tevî nerazîbûnên gelê Kurd jî meha sibatê Firaz Korkmaz û 9ê Nîsana 2024an jî Mehmet Kopal radestî Tirkiyê kirin.
Her duyan jî ji ber xebatên siyasî ceza wergirtibû û wekî penaberên siyasî çûbûn Fransayê.
Penaberê Kurd Serhat Gultekin ê ku li Tirkiyeyê 15 sal cezaya girtîgehê lê hatiye birîn roja 10ê Nîsanê li Fransayê hat girtin û 12ê Nîsanê radestî Tirkiyê hat kirin.
