Serokatiyên Iraqê, Serokomar Berhem Salih, Serokwezîr Mistefa Kazimî, Serokê Perlemantoyê Mihemed Helbûsî û Serokê Encûmena Bilind dadwerî Fayiq Zîdan îro Duşemê li koşka Selam a li Bexdayê, bi armanca dîtina çareyekê ji kirîza sîyasî re, civiyan.
Di daxuyaniya piştî civînê de hat ragihandin, parastina ewlehî, aramî û rêya demokratîk û destûrî li Iraqê erkê hemû pêkhateyên Iraqê ye û her wiha erkê saziyên dewletî û hêzên siyasî yên niştimanî ye, diyaloga avaker jî rêya herî rast e ji bo bidawîkirina hemû nakokiyên heyî ye.
Di daxuyaniya hevbeş de hat gotin, di vê hefteyê de qonaxeke nû ya guftûgoyên niştimanî birêve diçe û daxwaz ji Tevgera Sedirê kirin ku beşdarî guftûgoyan bibe.
Her wiha her çar serokatiyên Iraqê di daxuyaniya xwe ya hevbeş de, tekezî li ser parastina ewlehî, aramî û destûra Iraqê kirin.
Mistefa Kazimî ji Muqteda Sedir alîkariyê dixwaze
Serokwezîrê Iraqê Mistefa Kazimî ji xwepêşanderan daxwaz dike ku ji Navçeya Kesk vekişin û hemû alî aram bin.
Mistefa Kazimî ji Rêberê Tevgera Sedir Muqteda Sedir jî dixwaze, ji alîgirên xwe daxwaz bike ku ji Navçeya Kesk û ji nêzîkî saziyên hikûmetê vekişin, her weke çawa beriya niha li ser parastina saziyên dewletê rijd bûn.
Piştî ku hejmarek ji xwepêşanderan derbasî nav Koşka Hikûmî ya Baregeha Encûmena Wezîran a Iraqê ya li Navçeya Kesk bûn, Mistefa Kazimî biryar da, rûniştinên Encûmena Wezîran heta demeke nediyar werin rawestandin.
