Berdevkê Hikûmeta Îraqê Basim Ewadî di daxuyaniyekê de amarên kuştî û birîndarên êrişa Amerîkayê ragihand.
Berdevkê Hikûmeta Îraqê Basim Ewadî destnîşan kir ku di êrişê de 16 kes hatine kuştin û 25 kes jî birîndar bûne ku sivîl jî di nav de hene û ziyan gihiştiye avahî û milkên xelkê.
Basim Ewadî herwiha red kir ku ew berî êrişê hatibine agahdarkirin û diyar kir ku Amerîkayê rastiyan berovajî dike.
Berdevkê Hikûmeta Îraqê Basim Ewadî got:
“Ew îdiayeke derew e û berovajîkirina rastiyan e ji bo xapandina raya giştî ya navneteweyî û dûrketina ji berpirsiyariya qanûnî ya tawanê ku ji aliyê hemî kevneşopî û pîvanên navneteweyî ve tê redkirin.”
Ewadî diyar kir ku ku ev “êrişên dijminane” ewlehiya Îraqê û herêmê dixe metirsiyê.
Basim Ewadî tekezî kir û anî ziman:
“Îraq careke din qebûl nake ku xaka wê bibe cihê paqijkirina hesaban û divê hemû alî têbigihêjin ku xak û serweriya welatê me ne cihê gihandina peyaman û nîşandana hêzê ya di navbera dijberan de ye.”
Berdevkê Hikûmeta Îraqê êrişeke tund li hêzên Hevpeymaniya Navdewletî kir û got:
“Hevpeymaniya Navdewletî ji erkê xwe dûr ketiye û bûye metirsî li ser ewlehî û aramiya Îraqê û bûye hincet ji bo Îraq bikeve nav nakokiyên herêmî û navdewletî.”
Ji bo tolhildana kuştina 3 serbazên Amerîkî, balafirên şer ên Amerîkayê, derengiya şeva înê êrişî baregehên Supaya Pasdaran a Îranê û komên çekdar ên nêzîkî wê li Îraq û Sûriyeyê kirin.
Amerîkayê ragihand ku ew tenê “destpêk” e ku dê di dem û cihên nediyar de êrişên xwe berdewam bikin.
