Abdullah Ocalan doh xwest ku PKK xwe fesix bike û çekan deyne.
Mehmet Uçumê Şêwirmendê Sereke yê Recep Tayyîp Erdogan piştî bangê bi rêya hesabê xwe yê Xê peyamek belav kir.
Uçum di peyama xwe de got, "Hatibû gotin ku dê bangeke bê bazar, bê qeyd û bê şert be û bi wî rengî jî bû. Ji bo Tirkiyeyê êdî qonaxeke nû dest pê dike.”
“Daxuyaniyê got ku înkar nemaye, du netewe nînin”
Şêwirmendê Erdogan biland ku “Banga Ocalan li gorî Înîsiyatîva Dewletê bû” û ev tişt nivîsîn:
"Daxuyaniya Ocalan li gorî wê çaçove û naveroka Înîsiyatîva Dewletê bû ku Serokkomar Erdogan û Birêz Bahçelî ji destpêkê ve qal dikir.
Di dendika daxuyaniyê de hat destnîşankirin ku pirsgirêka nasnameyê nemaye, înkar nemaye, du netewe nînin, du zimanên fermî nînin, du welatîbûn nînin, daxwaza xweseriyê nîne, daxwaza federasyonê nîne. Xwedî li dewleta unîter hat derketin.
Ev taybetî hat gotin ku pirsgirêka navxweyî ya Kurdan a li Tirkiyeyê ku li ser bingeha înkarê û redê hatiye avakirin çareser bûye, mijar demokrasî ye, yekbûna bi dewlet û civakê re ye, bipêşvebirina demokrasiyê ye.
Bi zimanekî zelal hat gotin ku divê hemû kom çekên xwe deynin û rêxistina terorê xwe fesix bike.”
“Bangeke bê bazar û bê şert bû”
Mehmet Uçum “pirsgirêka Kurdan” bi rengê “projeyeke emperyalîst” û “pirgirêka derve” wesifand û got:
“Niha pirsgirêkeke pratîkî ye ku dê çi qasî li guh bidin vê bangê, yên ku guh nedinê dê necaman qebûl bikin.
Berî ku ev gazî were kirin, hat dîtin bê yên ku hewl didin vê gaziyê û qonaxa nû sabote û jehrî bikin, di nava provokasyoneke çi qasî mezin de bûn. Nikarîbûn bi ser bikevin, ji vir û pê ve jî dê nikaribin.
Hatibû gotin ku dê bangeke bê bazar, bê qeyd û bê şert be û bi wî rengî jî bû.
Ji bo Tirkiyeyê êdî qonaxeke nû dest pê dike.
Ji vir û pê ve, çawa ku bipêşvebirina demokrasiyê û xurtkirina wê daxwaz û berpirsyariya her kesî ye, her wiha parastina serxwebûna Tirkiyeyê, yekparçeyiya erdnîgarî û yekîtiya siyasî jî erkê her kesî ye.
Ti hinceta kesî nema ku xwe da aliyekî, dûr bimîne an jî li hemberî bisekine.
Em hemû bi hev re Tirkiye ne, divê em vê yekê êdî di her qadê de wekî hêzeke 86 milyonî nîşan bidin."
