Emerikayê çi kir û divê em Kurd çi bikin???

Lê hezar caran mixabin ku van rewşenbîr û siyasetmedarên me, rewşa bakurê Kurdistanê ku niha têde ye nabînin, lê li cîhanê çi bibe, çi biqewime dibînin!!!

Helbet heq û mafê her kesan e ku li ser her tiştekî fikir, nerîn û gotina xwe bêje. Lê ya min û gelekan ji we diêşîne ew e ku em bi wan zanînên xwe, bi wan tegîhiştinên xwe, helwest û cahdên em ji bona xelkê rê didin ji bona xwe nakin.

Aha ya min diêşîne û aciz dike jî ev e.

Rewşenbîr, ronakbîr û partiyên siyasî yên miletekî kolonî, bindest dema ji êşa gelê xwe bêtir li ser êşên gelan rawestin hûn bizanibin ku ew ne rewşenbîr û partiyên gelê xwe ne.

Ji roja ku Emerîka ji Afxanîstanê vekşiya ye û Talîbaniyan hemî welat girtin. Roj tuneye ku siyasetmedar û ronakbîrên me li ser vê nerîn û gotina xwe negotibin.

Bêtirên wan jî bi qasî şopandinên xwe Emerika rexne dikin û dibêjin; ´Kurdno hay ji xwe hebin, Emerîka her car an çi demê bixwaze dikare Kurdistanê jî radestî dagirkeran bike´.

Ez li ber şiroveyên weha dikevim û pê diêşim. Loma min xwest bersîva van camêrên Emerika gunehkar dikin, bi gotina serokê Emerîka ya Joe Bidin, bidim. Camêr vekrî û eşkere dibêje: ”Miletek ji bona azadiya xwe şer neke û ber xwe nede ew milet xelas bûye (Qadiya ye)”

Camêr pir eşkere xweş û zelal aniye zimên ku ji bona me kurdan divê ev bibe ders, bibe gotineke zêrîn, divê em vê bikin guhar û bi guhên xwe ve dalikînin da ku em bikarin li ser vê rawestin.

Ev gotina brêz Bidin çii dide me kurdan û divê kurd li gor vê gotinê çi bikiin? Li gor min camêr vekirî mesajeke zelal dide hemî dewlet û welatên bindest ku dibêje; ”heger hûn berxwe nedin, em nikarin we azad bikin û heta hetanî alîkariya we bikin”.

Emerîka û hemî dewletên mezin tu caran bi xêra bavê xwe alîkariya tu kes, milet û dewletan nakin. Her alîkariyeke wan ji bona berjewendiya wan e jî.

Loma dema berjewendiya wan bikeve xeterê ew alîkarî û piştgiriya xwe ji wan dewletên ku ew bi xwe alîkarî dikin, dikşînin. Wan bi tenê dihêlin ji ber ku wî miletî wî gelî tu caran berxwe nedana. (Rewşa Kurdan ya berê cûda ye) Tiştên hazir û nazir dixwazin..

Heger em kurd bixwazin Kurdistaneke azad û serbixwe bibînin, divê em li ser vê gotina rêzdar rawestin û derseke baş jê bigirin. Li gor wê jî divê em kurd ji nû de li ser rewşa xwe a siyasî ya her çar perçan, rawestin.

Lê bi qasî em dibînin ku hêjî rewşa başûrê kurdistanê ji bona serbixwebûnê, wan merc û şerên tê xwestin pêk neanîne. Lê pêkanîna wan ne dûr e jî.

Divê vê gotina brêz Bidin tesîreke erînê li ser hemî rêvebir, partî û dezgehên heyî yên başûrê kurdistanê bike da ku zûtirîn demê hemî şert û mercên ku mirov bikaribe bibe dewleteke serbixwe pêk bînin.

Ji dêlva ku em li gor vê ji partiyên xwe re, ji dezdeg û saziyên başûrê kurdistana xwe re bêjin û şirove bikin, gelek aqilmendin me hema ya xwe dibêjin: ”Emerîka çi demê bixwazî dikare kurdan bi tenê bihêle, leşkerên xwe vekşîne û başûrê Kurdistanê radestê tirk û farisan bike.

Na brano na, Emerika dibêje, Kurdno hûn jî lez bikin, ecele bikin, destên xwe sivik bigirin wan şert û mercên dewletbûnê yên kêm mane temam bikin da ku hûn bibin xwedî dewleteke serbixwe.

Heger hûn vê nekin aha we rewşa Afganistanê dît, em heta hetanê nikarin xwedîtiyê li we bikin. Divê hûn jî êdî şert û mercan temam bikin û weke dewleteke kurdî ya serbixwe di nava dewletên cîhanê de bijîn.

Hewldanên me, nivîskar, rewşenbîr, siyasetmedar û hwd divê ev be ku em bikaribin zûtirîn dema wan kêmaniyên ji bona Kurdistaneke serbixwe jî temam bikin û bibiin xwedî dewleta xwe li başûrê Kurdistanê...

Helbet wê Emerîka û dewletên mezin zû bi zû terka başûrê Kurdistanê nekin Lê ji her tiştekî re jî demek û wextek heye. Heger te di demê de ew pêk neanî, heger te ew firseta ji bona dewleteke serbixwe ji dest berda aha tu yê jî nebe dewlet û tê bibe weke afxanîstanê…

Heta ku Pêşmerge hebin û şervanê xwe û parezvenê welatê xwe bin, netirsin Emerîka weke Afganistanê dê tu caran kurdan nehêlin û nerin. Lê divê tiştên lazim jî em pêk bînin…