Ev Şansa Kurdan ya Talî ye!

Carekê divê em zelal bikin ku em kîn e? Em ew kurdên ku welatî wî di nava, devlixwîn û zaliman da hatiye dabeşkirin.

Em ew kurdên ku zimanê wî qedexe û ji hemî hêjayiyên xwe hatiye dûrxistin ku hêdî hêdî kurdbûna xwe, mejûyê xwe wenda dikin.

Em ew kurdên bi salan e ku her bûne kole û dagirker tenê bi van çavan li me mêze dikin û me weha dibînin e. Loma dixwazin em tim weke kolê wan bîmînin û bibin xizmetkarên wan.

Em ew kurdên ji hev hez nakin, li dij hevin û ev li dijhevbûna me ya ne li cih îmkan daye û dide dijmin da ku ew bêtir nakokiyên nava me kûr dikin û bikin ji bona em nêzîkî hev nebin. Em tim bi çavên neyaran li hev binêrin.

Em ew kurd in ku me heta niha tama dewletbûn û serxwebûnê negirtine, loma jî hin li dij vê dertên. Ji ber ku nizanin ew çiqasî xweş e, çiqasî delal û bi tam e.

Hema carekê jî be kurd dewletbûn û serxwebûnê bitamînin, hûn bawer bin êdî ew tam wê ji ser zimanê wan nere û ji bona ew tam bimîne çi lazim be wê bikin. Her weha tiştên min li jor got wê hemî jî êdî li gor dilê kurdan bibe. Ne weke dagirker dixwazin...

Dema xelkek, mileteke bi tama dewletbûna xwe mezin nebe, helbet wê hêjayî û qîmeta vê jî nizanibe ku dewlet çi ye û çima divê dewleta me re jî hebe.

Dema miletek bi zimanê xwe tevnegere, bi wî nenivîsîne helbet wê hîs û baweriya wî/ê jî li gor wî zimanê ew bi kar tîne, bikemile

Dema miletek, xelkek ji hev hez neke, bratiya nava xwe xurt neke, wê dijminê wan jî vê weke firsetekê bi kar bîne, da ku ew milet, ew xelk, tim weke kole bimînin.

Aha ji ber van sedemanane divê kurd jî dewleta xwe a serbixwe ragihîne û bi vê ragihadinê kurd li ser erda xwe, li vê cîhana lê dijîn bibin xwedî maf, heq, huqûq û dewlet. Çi dema kurdan ew tam, ew xweşî girt êdî mesele diqede ji ber ku êdî wê her bi wê tamê bijîn...

Bi ragihandina dewleta serbixwe dê temama kurdan ji sêwîtiyê xilas bibin. Ji ber ku miletekî bê dewlet, miletekî ne azad, xelkê wê tim sêwî ne.

Divê em careke bi çavên xwe bibînin û bi guhên xwe bibihîzin bê niha çawa dagirkerên welatê me ketine nava tirs û xofa ku wê kurd bibin xwedî dewleta xwe. Bê çawa hesab û planan çê dikin ji bona vê refaranbûma ku wê bibe hebûna kurdan, wê bibe jiyana kurdan wê bibe azadiya kurdan, têk bibin.

Ji ber vê ye divê hemî kurd li seran serên cihanê, ji bona pêkhatina referandûma ku wê bi xwe re azadiya kurdan bîne, biparêzin. Xwedî lê derkevin. Na heger vê nekin û hin jî weke dijmin li dij vê derkevin û nehêlin ev bibe aha wê gavê êdî kurd bi tamamî wenda dikin. Heger wenda bikin, wê careke din heta sed saleke din jî dê nikaribin li xwe vegerin. Ev şansa me kurdên her çar perça ya talî ye. Lewra divê herkes li gor vê helwesta xwe dîne û li gor vê jî tevbigerin.

Kurd divê bi çi awayî, bi çi reng û dengan, bi çi piştgirî û qawetan xwedî li vê derkevin. Berî her tiştî, kurdên niha li başûrê kurdistanê li ser erda xwe bi awayekî azad dijîn; divê bi dengdana xwe vê ji cîhanê re bidin zanîn ku ew dewleta xwe a serbixwe dixwazin.

Divê bidin zanîn û îspatkirinê ku êdî kurd naxwazin weke kolan bijîn û bi wê dengdana xwe zîncîrên koletiyê biqetînin û ala xwe ya rengîn di nava alên cihanê de hildin.

Yên ne li ser erda xwe ne, weke koçber li welatên cihanê hatine belavkirin jî, bi nivîs û gotinên xwe, bi meş û xwe pêşandanên xwe, bidin zanîn ku ew refarandûm, deng, awaz û rûhê kurdan e.

Divê li seransera cihanê rewşenbîr, nivîskar, ozan, siyasetmedar û hwd. Bi deng û pênûsên xwe bidin diyarkirin ku ji bona dengê azadî û dewletbûna xwe binivîsînin, bistirên, bê kurd çima dewleta xwe dixwazin. Vê binivîsin û bi gotarên xwe bi dostên xwe yên ewropa bidin zanîn bê ev refarandûm çiqasî pêwîst e.

Ya herî talî divê kurd vê ji bîr nekin ku ev referandûma wê di 25 îlona 2017 li başûrê kurdistanê pêk bê, hebûn û nebûna hemî kurdan e. Ew kesên dixwazin xwe tune bikin, mafê wan e li dij vê refarandûmê derkevin.

Ew kesên dixwazin xwe biparêzin, weke kurd li ser axa xwe bi azadî bijîn, ziman û li hemî hebûnên xwe xwedî derkevin, divê ew jî dengê ERÊ bi kar bînin. Aha mesela me kurdan ev e. De kurdno baş bifikirin û biryara xwe bidin. Ev biryara te ya talî ye. Ya tê xwe tune bike. Ya jî bi vê referandûmê tê xwe, axa xwe, parastin û hebûna xwe, di qada navneteweyî de biparêze ku kurd jî dixwazin bibin xwedî dewleta xwe..

Tercih, daxwaz û helwest ya we kurdan e. Yên ji xwe hez dikin wê bi saya vê referandûmê xwe biparêzin. Yên ji xwe hez nakin û dixwazin tim weke kole bijîn jî li dijrawestandina vê referandûmê dê xwe tune bikin da ku her weke kole bibînin...